პარლამენტის თავმჯდომარის, არჩილ თალაკვაძის თქმით, მმართველმა გუნდმა მოამზადა წინადადება, რომელიც ყველა მხარისთვის მისაღები იქნება. ამის შესახებ მან დღეს, 20 დეკემბერს ოპოზიციასთან შეხვედრის დაწყების წინ განაცხადა.

მისივე თქმით, მათი მოდელი უზრუნველყოფს, რომ რეგიონების, დედაქალაქის წარმომადგენლობა და პროპორციული არჩევნების წილი შერეულ მოდელში იყოს დაბალანსებული.

"რეალურად, ამ მოდელის წარდგენის შემდეგ დღეს გამოჩნდება, თუ რომელი პოლიტიკური პარტია არის ორიენტირებული შეთანხმებაზე და ვის სურს რეალურად დემოკრატიული და თავისუფალი არჩვენების ჩატარება და ვის აქვს სხვა ინტერესები, რომელიც შესაძლოა საარჩევნო ყუთის გვერდის ავლით ცვლილებებთან იყოს რაიმეთი დაკავშირებული", — აღნიშნა პარლამენტის თავმჯდომარემ.

დიპლომატიური კორპუსის მონაწილეობით ოპოზიციასა და მმართველ გუნდის შორის მეოთხე შეხვედრა მიმდინარეობს. მხარეები ისევ საარჩევნო სისტემას განიხილავენ.

პროპორციულის ჩავარდნა, პროტესტი და პოლიტიკური დაპირისპირება — მოკლედ

მას შემდეგ, რაც ქართული ოცნების ე.წ. აჯანყებულმა დეპუტატებმა ჩააგდეს საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო, ოპოზიციისა და სამოქალაქო აქტივისტების საერთო პროტესტი დაიწყო. დაპირისპირებული ოპოზიციური ჯგუფები ერთი მოთხოვნის ირგვლივ გააერთიადნენ — ვადამდელი არჩევნების პროპორციული სისტემითა და ე.წ. გერმანული მოდელით ჩატარება.

პროტესტის ფარგლებში პიკეტირებული იყო მთავარი საკანონმდებლო ორგანო, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციებმა მაჟორიტარი დეპუტატებისა და ოცნების ოფისთან გადაინაცვლა, სადაც აქტივისტებს მმართველი გუნდის მხარდამჭერები ხვდებოდნენ და ფიზიკურად უსწორდებოდნენ. გარდა ამისა, განახლდა საპროტესტო მოძრაობა "არა ნაცებს" და გაიმართა აქციები სახელად "დემიშიზაცია", რომელთა წევრები ნაციონალური მოძრაობის ოფისებს კვერცხებს და ცოცხებს ესროდნენ, მხარდამჭერებსა და აქტივისტებს კი ფიზიკურად უსწორდებოდნენ.