პრემიერ-მინისტრის მრჩეველი და ყოფილი სახალხო დამცველი სოზარ სუბარი აცხადებს, რომ "სისტემა ყოველთვის სწორად ვერ იმუშავებს, რადგან შეუძლებელია, ყველაფერი ზუსტად გათვალო". ასე გამოეხმაურა ის ტელეკომპანია იმედის ეთერში, 15 წლის ლუკა სირაძის გარდაცვალებას და ამ ფაქტის გამო დაწყებულ პროტესტს.

არგუმენტად სუბარს სხვა ქვეყნების მაგალითი მოჰყავს და აცხადებს, რომ მკვლელობები და თვითმკვლელობები ხდება განვითარებულ ქვეყნებში, სადაც განათლების სისტემა მაღალ დონეზე დგას.

"ჩვენ რომ გადავხედოთ, იგივე შეერთებულ შტატებში, დემოკრატიაც არის, პოლიციაც უმაღლეს დონეზე მოქმედებს და რავიცი, სოციალური ინსტიტუტებიც, ფსიქოლოგიური სამსახურებიც, ყველაფერი არის, მართლა, უმაღლეს დონეზე, მაგრამ წელი არ გავა, რომ არ მოხდეს რაღაც ისეთი ტრაგედია, როდესაც რომელიმე სკოლის მოსწავლე შედის სკოლაში, კვდება ათეულობით ადამიანი, შემდეგ ეს სუიციდით ამთავრებს...

რამდენიმე წლის წინ მსგავსი შემთხვევა იყო გერმანიაში, კიდევ იმავე პერიოდში მსგავსი შემთხვევა იყო ფინეთში, რომლის განათლების სისტემაც აღიარებულია, როგორც მსოფლიოში ერთ-ერთი საუკეთესო", — განაცხადა მან.

სუბარი ამბობს, რომ პრობლემა არამხოლოდ გამოძიების ნაწილში იყო, არამედ მანამდეც, რადგან ბავშვის წარწერის შინაარსსაც უნდა მიქცეოდა ყურადღება.

"პირიქით, სწორედ ამ წარწერების გაკეთებას მოჰყვა მისი პოლიციაში დაბარება, აი, რამ არ იმუშავა ამ დროს: განათლების სისტემამ? სკოლამ? სკოლის დირექციამ? საზოგადოებამ? სად დავუშვით ეს შეცდომა?" — აცხადებს ის.

15 წლის ლუკას საქმე

15 წლის ბიჭი, რომელიც დაკითხვის შემდეგ კორპუსიდან გადმოხტა 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.

შინაგან საქმეთა სამინისტრო ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია. მათ გამოძიება თვითმკვლელობამდე მიყვანის მუხლით დაიწყეს. გამოძიებას სწორედ ის განყოფილება აწარმოებს, სადაც არასრულწლოვანზე, სავარაუდოდ, ფსიქოლოგიურად იძალადეს.

სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს. ჩოლოიანი ბრალს არ აღიარებს.