დღეს, 12 დეკემბერს საქართველოს პარლამენტმა 20-დან 14 კანდიდატი უზენაეს სასამართლოში უვადოდ დანიშნა. ეს იმას ნიშნავს, რომ მათ შეეძლებათ ამ თანამდებობაზე საპენსიო ასაკამდე, 65 წლამდე იმუშაონ.

შესაბამისად, თითოეული მოსამართლის შემთხვევაში ინდივიდუალურია, ვინ რომელ წლამდე შეძლებს მუშაობას. მათი მუშაობის პერიოდი იუსტიციის უმაღლესი საბჭოს არამოსამართლე წევრმა, ნაზი ჯანეზაშვილმა გამოთვალა. ასაკიდან გამომდინარე ყველაზე მეტ ხანს 2053 წლამდე, 30 წელზე მეტ ხანს ქეთევან ცინცაძე იმუშავებს, ყველაზე მცირე დროით კი — ნუგზარ სხირტლაძე (5 წელი).

მისი გამოთვლით, უზენაესი სასამართლოს მოსამართლეები იქნებიან:

  1. ქეთევან ცინცაძე — 2053 წლამდე;
  2. ალექსანდრე წულაძე — 2049 წლამდე;
  3. ლევან მიქაბერიძე — 2047 წლამდე;
  4. გიორგი მიქაუტაძე — 2047 წლამდე;
  5. მამუკა ვასაძე — 2046 წლამდე;
  6. შალვა თადუმაძე — 2043 წლამდე;
  7. თამარ ზამბახიძე — 2040 წლამდე;
  8. ვლადიმერ კაკაბაძე — 2039 წლამდე;
  9. მერაბ გაბინაშვილი — 2038 წლამდე;
  10. მირანდა ერემაძე — 2038 წლამდე;
  11. ლალი ფაფიაშვილი — 2037 წლამდე;
  12. ნინო ქადაგიძე — 2034 წლამდე;
  13. მაია ვაჩაძე — 2027 წლამდე;
  14. ნუგზარ სხირტლაძე — 2025 წლამდე.

12 დეკემბრის მოვლენები მოკლედ

დღეს, 12 დეკემბერს სამოქალაქო მოძრაობის აქტივისტებმა და პოლიტიკური პარტიის წარმომადგენლებმა პარლამენტის შესასვლელების პიკეტირება სცადეს, თუმცა დეპუტატები საკანონმდებლო ორგანოში მაინც შევიდნენ. აქციაზე პოლიციამ ჯამში 16 პირი დააკავა.

პარლამენტის უპარტიო დეპუტატი, ეკა ბესელია ამბობდა, რომ მოსამართლეთა არასასესიო კვირაში არჩევა პარლამენტის რეგლამენტს ეწინააღმდეგებოდა. ის რამდენიმე წუთის განმავლობაში კომიტეტის თავმჯდომარეს არ აძლევდა საშუალებას კანდიდატურები განეხილათ.

პროცესის ჩასაშლელად კენჭისყრის დაწყებამდე რამდენიმე წუთით ადრე პლენარულ სხდომათა დარბაზში გაურკვეველი ნივთიერება გაუშვეს, რამდენიმე ადამიანი ცუდად გახდა. ამ მიზეზით სხდომათა დარბაზი დაატოვებინეს დეპუტატებს და კენჭისყრამ რამდენიმე საათით გადაიწია. საქმეზე გამოძიება შსს-მ სისხლის სამართლის კოდექსის 117-ე მუხლით დაიწყო. ამ მუხლით ჯანმრთელობის განზრახ მძიმე დაზიანება მინიმუმ 3-წლიანი პატიმრობით ისჯება. ქართულმა ოცნების ერთ-ერთმა დეპუტატმა მომხდარი ტერორისტულ აქტად, დანარჩენებმა კი ქიმიურ თავდასხმად შეაფასეს. მომხდარზე პასუხისმგებლობა #სირცხვილიამ აიღო.

საბოლოოდ, კენჭისყრა მაინც ჩატარდა და ქართულმა ოცნებამ 14 მოსამართლე უზენაეს სასამართლოში უვადოდ დანიშნა.