პარლამენტთან იუსტიციის უმაღლესი საბჭოს არამოსამართლე წევრი, ანა დოლიძე და დამოუკიდებელი იურისტები მივიდნენ. შეძახილებით "სია უნდა ჩავარდეს", "სასამართლო ჩვენია" შეძახილებით ისინი მოითხოვენ, რომ პარლამენტმა მხარი არ დაუჭიროს უზენაესის სასამართლოს მოსამართლეთა კანდიდატების სიას.

"ქართული ოცნების წევრებო, ერთადერთი არჩევანი, რომელიც თქვენ ახლა გაქვთ, არის დააჭიროთ წითელ ღილაკს, არ შეუშვათ არცერთი კლანის წევრ უზენაეს სასამართლოში. ეს სასამართლო არ არის არც ჩინჩალაძის, არც მურუსიძის, არც ქართლი ოცნების, არც ივანიშვილის, ქართული სასამართლო ჩვენია", — თქვა ანა დოლიძემ.

იურიდიულ საკითხთა კომიტეტზე დღეს უზენაესი სასამართლოს მოსამართლეობის 20 კანდიდატს კენჭს უყრიან. კანდიდატებს დეპუტატები ხმას ღია კენჭისყრაზე მისცემენ. ამის შემდეგ კანდიდატებს კენჭი პლენარულ სხდომაზე უნდა უყარონ.

ცოტა ხნის წინ, იუსტიციის უმაღლესი საბჭოს კიდევ ერთმა არამოსამართლე წევრმა, ნაზი ჯანეზაშვილმა გაავრცელა ინფორმაცია, რომ ის პარლამენტში არ შეუშვეს. მისი თქმით, მის გარეშე აირჩევენ კლანის მხარდამჭერ მოსამართლეებს.

კოალიცია დამოუკიდებელი და გამჭვირვალე მართლმსაჯულებისთვის უმრავლესობას მიმართავს, რათა მოსამართლეების კანდიდატურების შესათანხმებლად ოპოზიციასთან მოლაპარაკებები აწარმოოს და კანდიდატები დამოუკიდებლად საკასაციო სასამართლოში არ განამწესოს. ორგანიზაცია აღნიშნავს, რომ კანდიდატთა ნაწილი ხშირ შემთხვევაში ელემენტარულ სამართლებრივ შეკითხვებსაც კი ვერ პასუხობდა.

კენჭისყრის პარალელურად პარლამენტთან დილიდან იმართება აქციაც. ოპოზიცია და სამოქალაქო აქტივისტები უმრავლესობას მოუწოდებენ, მხარი არ დაუჭირონ მოსამართლეთა სიას.