ნაციონალური მოძრაობის თავმჯდომარე, გრიგოლ ვაშაძე ამბობს, რომ ქუთაისში მათ ოფისთან ქართულმა ოცნებამ სახელმწიფო მოხელეები მიიყვანა და აქციას ატარებინებს.

"ყველანაირად ცდილობენ, რომ გვიბიძგონ არაცივილიზებული მოქმედებისკენ. ვერ მოგართვით. არავითარი სამოქალაქო დაპირისპირება არ იქნება", — განაცხადა ვაშაძემ.

დემიშიზაცია ქუთაისიდან იწყება — დღეს, პირველ დეკემბერს ქუთაისში ქართული ოცნების მხარდამჭერები ნაციონალური მოძრაობის ოფისთან საპროტესტო აქციას მართავენ. ისინი ოფისს კვერცხებსა და საღებავს ესვრიან. მოქალაქეების ინფორმაციით, ოფისში იმყოფება ნაციონალური მოძრაობის ლიდერი, გრიგოლ ვაშაძე.

აქტივისტები თეთრი ხიდზე შეიკრიბნენ და ნაციონალური მოძრაობის ოფისთან მსვლელობით მივიდნენ. ისინი ამტკიცებენ, რომ აქცია მშვიდობიანი ხასიათისაა.

ადგილზე მობილიზებულია პოლიცია.

ნაციონალური მოძრაობის ოფისთან საპროტესტო აქცია 29 ნოემბერსაც გაიმართა. მაშინაც ქართული ოცნების მხარდამჭერებმა ოფისს კვერცხები და ცოცხები დაუშინეს. გარდა ამისა, კარზე სიმბოლური ბოქლომი ჩამოკიდეს.