დღეს, სახალხო დამცველის აპარატმა, სახელმწიფო დაწესებულებებში შეზღუდული შესაძლებლობის მქონე პირთა უფლებრივი მდგომარეობის შესახებ სპეციალური ანგარიში წარადგინა. მონიტორინგი სახელმწიფოს ხუთ რეზიდენტულ დაწესებულებაში ჩატარდა და კვლევის მიზანი შშმ პირთა მდგომარეობის შესწავლა იყო.

მონიტორინგის შედეგად გამოვლინდა დარღვევები, როგორც ინსტიტუციური მოწყობის, ასევე ხარვეზიანი რეგულაციის და მავნე პრაქტიკის არსებობის კუთხით. ანგარიშის მიხედვით, კვლევის დროს გამოიკვეთა შემდეგი პრობლემები:

  • არაადაპტირებული ინფრასტრუქტურა;
  • პროფესიული და დამხმარე კადრების სიმწირე;
  • ფსიქო-სოციალური სერვისებისა და პროფესიული კადრების ნაკლებობა;
  • ბენეფიციარების საზოგადოებისგან იზოლირება;
  • ოჯახებთან კონტაქტის სიმცირე.

ომბუდსმენის აპარატის წარმომადგენელთა განცხადებით, ბენეფიციარებთან ინტერვიუს დროს, პირდაპირი ძალადობის ფაქტი არ დადასტურებულა, თუმცა გამოიკვეთა შემთხვევები, რომლებიც არასათანადო მოპყრობად შეიძლება შეფასდეს. გარდა ამისა, გამოიკვეთა ბულინგის ფაქტები ბენეფიციარებს შორის.

სახალხო დამცველი მიიჩნევს, რომ სახელმწიფო ზრუნვის ქვეშ მყოფი შშმ პირთა უფლებები სათანადოდ არ რეალიზდება და ზოგიერთ შემთხვევაში ისინი დისკრიმიანციისა და ძალადობის მსხვერპლნი ხდებიან. უჩა ნანუაშვილის განცხადებით, მათი ხელს არ უწყობენ საზოგადოებაში ინტეგრირებისთვის.

მონიტორინგი ჩატარდა სახელმწიფოს ხუთ რეზიდენტულ დაწესებულებაში:

  • თბილისის ჩვილ ბავშვთა სახლში, სადაც იმ დროისთვის იმყოფებოდა 58 ბენეფიციარი;
  • კოჯრის შშმ ბავშვთა სახლში – 28 ბენეფიციარი;
  • ძევრის შშმ პირთა პანსიონატი – 64 ბენეფიციარი;
  • დუშეთის შშმ პირთა პანსიონატში – 43 ბენეფიციარი;
  • მარტყოფის შშმ პირთა პანსიონატში – 69 ბენეფიციარი.