პარლამენტის თავმჯდომარე არჩილ თალაკვაძე პარლამენტში კვლავ ისე შევიდა, რომ მიმდინარე მოვლენებზე მედიისთვის კომენტარი არ მიუცია. ჟურნალისტების კითხვას, გრძნობს თუ არა პასუხისმგებლობას იმაზე, რაც პარლამენტთან ხდება, თალაკვაძემ არ უპასუხა.

დილიდან საკანონმდებლო ორგანოს პიკეტირება იგეგმებოდა, თუმცა პოლიცია ოპოზიციის წევრებს მომზადებული დახვდა. პარლამენტის შენობის ყველა შესასვლელთან პოლიცია მობილიზებულია. საკანონმდელო ორგანოსთან მისასვლელი ყველა გზა რკინის ჯებირებით არის გადაკეტილი.

პარლამენტის პიკეტირება 26 ნოემბერს დაანონსდა. მოქალაქეები, რომლებიც ბიძინა ივანიშვილის დაპირების არშესრულებას აპროტესტებენ თითქმის 10 დღეა აქციას მართავენ. მათ უნდათ, რომ პროპორციულ სისტემაზე გადასვლის კანონპროექტის ჩამგდები მმართველი პარტიის წევრები პარლამენტში არ შეუშვან. პარლამენტის სხდომებს ბოიკოტის ნიშნად არ ესწრება ნაციონალური მოძრაობა, ევროპული საქართველო და სხვა დამოუკიდებელი დეპუტატები.