პოლიციამ პარლამენტის წინ აქტივისტების დაკავება დაიწყო. სამართალდამცავებთან დაპირისპირებაში მოქალაქეები ძირს ვარდებიან და მათ მანქანაში ძალით სვამენ. როგორც ადგილიდან On.ge-ს ჟურნალისტი იუწყება, სულ მცირე სამი ადამიანია დაკავებული.

დაპირისპირება მას შემდეგ დაიწყო, რაც პოლიციის კორდონით შემოსაზღვრულ ტერიტორიაზე ევროპულის საქართველოს დეპუტატი, ელენე ხოშტარია და სირცხვილიას აქტივისტები შეიპარნენ.

ბოლო დღეების მოვლენები

მას შემდეგ, რაც ქართული ოცნების დეპუტატებმა პროპორციული საარჩევნო სისტემის კანონპროექტი ჩააგდეს, საქართველოს მასშტაბით სხვადასხვა ქალაქებში საპროტესტო აქციები იმართება. პროტესტის ფარგლებში პიკეტირებული იყო მთავარი საკანონმდებლო ორგანოც, რომლის შესასვლელებიც ხელისუფლებამ ორჯერ სპეცრაზმისა და წყლის ჭავლის გამოყენებით გახსნა.

აქციის დაშლის შემდეგ ოპოზიციამ და სამოქალაქო აქტივისტებმა პროტესტი ახალი ფორმა "მაინც დაგაბოქლომებთ" დაიწყეს. ისინი სხვადასხვა ადმინისტრაციულ შენობებსა და ქართული ოცნების დეპუტატების ოფისებს ბოქლომებს ადებენ.

მას შემდეგ, რაც პარლამენტის პიკეტი მესამედ დაანონსდა, ხელისუფლებამ პარლამენტის მიმდებარე ქუჩები რკინის კონსტრუქციებით ჩაკეტა. კონსტრუქციები ხელს უშლიდა მოქალაქეებს გადაადგილებაში. პოლიციამ გზები აქციის დაშლის შედეგ გაათავისუფლა.