აშშ-ს პრეზიდენტი დონალდ ტრამპი თავისივე იმპიჩმენტის მოსმენაზე დაიბარეს. წარმომადგენელთა პალატის იურიდიული კომიტეტის თავმჯდომარემ, ჯეროლდ ნადლერმა ტრამპი მოსმენაზე 4 დეკემბერს მიიწვია.

უშუალოდ ტრამპი საიმპიჩმენტო პროცედურის მიმართ კრიტიკულადაა განწყობილი და "კუდიანებზე ნადირობას" უწოდებს. თუ ის მოსმენაში მონაწილეობას მიიღებს, სხვა მოწმეებისთვის კითხვების დასმას შეძლებს.

ფლორიდაში გამოსვლის დროს დონალდ ტრამპმა განაცხადა, რომ დემოკრატების მიერ დაწყებული საიმპიჩმენტო პროცედურა მას საპრეზიდენტო არჩევნებში გამარჯვებაში დაეხმარება.

იმპიჩმენტის პროცედურა დონალდ ტრამპისა და უკრაინის პრეზიდენტის, ვოლოდიმირ ზელენსკის სატალეფონო საუბრის გარშემო არსებული სკანდალის გამო დაიწყო. როგორც საუბრის ტრანსკრიპტიდან ჩანს, აშშ-ს პრეზიდენტი ზელენსკის ურჩევს, რომ უკრაინაში ყოფილი ვიცე-პრეზიდენტის, ჯო ბაიდენისა და მისი შვილის საქმიანობა გამოიძიონ.

დემოკრატები, რომლებიც ქვედა პალატას აკონტროლებენ, დონალდ ტრამპს თანამდებობის ბოროტად გამოყენებაში ადანაშაულებენ. თვითონ ტრამპი ყველა ბრალდებას უარყოფს. იმპიჩმენტის პროცედურის დაწყებას კი მან სახელმწიფო გადატრიალება უწოდა.

ამავე თემაზე: