პოლიციამ სატვირთოს კიდევ ერთი მძღოლი დააკავა, რომელსაც რუსთაველის წინ აქციისთვის შეშა და ღამის გასათენებლად სხვადასხვა ნივთი მიჰქონდა. ნაციონალურ მოძრაობაში On.g-ს უთხრეს, რომ დაკავებული მძღოლი ბესო გაზდელიანი, რომელიც ლილო-ხევის რაიონული ორგანიზაციის თავმჯდომარეა.

რამდენიმე საათის წინ პოლიციამ დააკავა ევროპული საქართველოს ორი წევრი, რომელთაც, ასევე, აქციისთვის შეშა და კარვები მიჰქონდათ. დაკავებულთაგან ერთ-ერთი პარტიის რეგიონული სამსახურის უფროსი, კობა ზაქარეიშვილია.

ორივე შემთხვევაში საქმე ადმინისტრაციულ სამართალდარღვევათა კოდექსის 173-ე მუხლით აღიძრა, რაც სამართალდამცავის კანონიერი მოთხოვნისადმი დაუმორჩილებლობას გულისხმობს და იწვევს დაჯარიმებას 1 000 ლარიდან 4 000 ლარამდე ოდენობით ან ადმინისტრაციულ პატიმრობას 15 დღემდე ვადით. ავტომობილები საპატრულო პოლიციამ საჯარიმო ავტოსადგომზე გადაიყვანა.