ნაციონალური მოძრაობის ლიდერი ნიკა მელია აცხადებს, რომ წინააღმდეგი არ არის განიხილოს გირჩის ინიციატივა იმის შესახებ, რომ არჩევნებში გამარჯვების შემთხვევაში ენმ-ს წევრები ძალოვანი სტრუქტურების ხელმძღვანელებად არ დაინიშნონ.

"რა თქმა უნდა, ყველა წინადადება იქნება განხილული, მე მჯერა ამის და მე პირადად მოწადინებული ვარ", — განაცხადა მან ტელეკომპანია პირველის ეთერში.

მელია განმარტავს, რომ პრობლემის აღმოსაფხვრელად მხოლოდ ეს არ კმარა და მნიშვნელოვანია ძალოვანი სტრუქტურების რეფორმირებაც.

"შეიძლება გირჩის ან ნებისმიერი სხვა პარტიის წარმომადგენელი გახდეს პროკურორი ან შს მინისტრი, მაგრამ ვერ გაართვას თავი ისე, როგორც წარმოუდგენია. ამიტომ, უნდა იყოს ბალანსი სახელისუფლებო შტოებს შორის; სისტემა უნდა იყოს იმდაგვარი, რომ რაც არ უნდა კეთილშობილი ადამიანი აღმოჩნდეს მაღალ თანამდებობაზე, უბრალოდ არ გაგიჟდეს და იყოს ფარგლებში მოქცეული", — განაცხადა მან.

გირჩი პროპორციული საარჩევნო სისტემის მოთხოვნით გაერთიანებულ ოპოზიციას სთავაზობს, ივანიშვილს ხელიდან "ხალხის დაშინების მთავარი ბერკეტი" გამოაცალონ და არჩევნებში გამარჯვების შემთხვევაში ძალოვანი სტრუქტურების ხელმძღვანელებად ენმ-ს წევრები არ დაინიშნონ.

"პრინციპულად მნიშვნელოვანია, ადამიანებმა დაიჯერონ, რომ ხელისუფლების ცვლილების შემდეგ ნაციონალური მოძრაობის ხელში არ აღმოჩნდება თოფიანი ხალხი. ეს არის: პოლიცია, პროკურატურა და სუს. მიუხედავად იმისა, ვინ როგორ აფასებს წარსულს; გასაგებია, რომ ადამიანები სხვადასხვანაირად აფასებენ მას; ნაციონალურმა მოძრაობამ ვერ დაიბრუნა ადამიანების ნდობა და ეს არის ერთ-ერთი მთავარი ბერკეტი ოპოზიცის", — განაცხადა ჯაფარიძემ.

ევროპული საქართველოს ლიდერმა, დავით ბაქრაძემ განაცხადა, რომ ნებისმიერი ინიციატივა, რომელიც ხალხს დაარწმუნებს, რომ ოპოზიციის გამარჯვებას საფრთხე არ მოჰყვება, განხილვის ღირსია.