გირჩი პროპორციული საარჩევნო სისტემის მოთხოვნით გაერთიანებულ ოპოზიციას სთავაზობს, ივანიშვილს ხელიდან "ხალხის დაშინების მთავარი ბერკეტი" გამოაცალონ. კერძოდ, გირჩი გამოდის ინიციატივით პროპორციულ არჩევნებში გამარჯვების შემთხვევაში ძალოვანი სტრუქტურების ხელმძღვანელებად ენმ-ს წევრები არ დაინიშნონ.

"პრინციპულად მნიშვნელოვანია, ადამიანებმა დაიჯერონ, რომ ხელისუფლების ცვლილების შემდეგ ნაციონალური მოძრაობის ხელში არ აღმოჩნდება თოფიანი ხალხი. ეს არის: პოლიცია, პროკურატურა და სუს. მიუხედავად იმისა, ვინ როგორ აფასებს წარსულს; გასაგებია, რომ ადამიანები სხვადასხვანაირად აფასებენ მას; ნაციონალურმა მოძრაობამ ვერ დაიბრუნა ადამიანების ნდობა და ეს არის ერთ-ერთი მთავარი ბერკეტი ოპოზიცის", — განაცხადა ჯაფარიძემ რუსთავი 2-თან

ევროპული საქართველოს ლიდერმა, დავით ბაქრაძემ განაცხადა, რომ ნებისმიერი ინიციატივა, რომელიც ხალხს დაარწმუნებს, რომ ოპოზიციის გამარჯვებას საფრთხე არ მოჰყვება, განხილვის ღირსია. ნაციონალური მოძრაობის პოლიტიკური საბჭოს წევრი ლევან ბეჟაშვილი კი აცხადებს, რომ ისინი მომხრე არიან ძალოვანი სტრუქტურების ხელმძღვანელები არასამთავრობო სექტორის ჩართვით შეარჩიონ.

ამ საკითხზე ოპოზიციის ლიდერები ახლა მსჯელობენ ლეიბორისტული პარტიის ოფისში. გარდა ამისა, ისინი ხვალინდელი საპროტესტო აქციისა და პარლამენტის პიკეტირებისთვის ემზადებიან.