პრემიერ-მინისტრ გიორგი გახარიას განცხადებით, საოკუპაციო რეჟიმის მიერ გატაცებული ექიმის, ვაჟა გაფრინდაშვილის დასაბრუნებლად სახელმწიფო ორგანოები 24 საათიან რეჟიმში მუშობენ. მისივე თქმით, მთავრობა იყენებს ყველა საერთაშორისო ინსტრუმენტს.

გარდა ამისა, პრემიერმა აღნიშნა, რომ საკითხის სპეციფიურობიდან გამომდინარე ყველამ უნდა დაიცვას ინფორმაციის გავრცელების სტანდარტები.

"პირველ რიგში, ეს სტანდარტები უნდა გავითვალისწინოთ ბატონი ვაჟას და მისი ოჯახის ინტერესებიდან გამომდინარე", — განაცხახა გახარიამ.

პრემიერის განცხადების საპირწონედ, სამოქალაქო აქტივისტები და ოპოზიცია მთავრობას უმოქმედობაში ადანაშაულებს. მათი თქმით, გადადგმული ნაბიჯები არ არის საკმარისი უკანონოდ დაპატიმრებული გაფრინდაშვილის გასათავისუფლებლად.

9-11 ნოემბერს ე.წ. საზღვრის კვეთის ბრალდებით საქართველოს 4 მოქალაქე დააკავეს, მათ შორის ერთ-ერთი ექიმი ვაჟა გაფრინდაშვილი იყო. დე ფაქტო სასამართლოს გადაწყვეტილებით, დაკავებულთაგან 3 პირს ფულადი ჯარიმა დააკისრეს და ე.წ. რესპუბლიკის ტერიტორია დაატოვებინეს, გაფრინდაშვილი კი დააპატიმრეს, რადგან მან საზღვრის კვეთა არ აღირა და ამბობდა, რომ საქართველოს ტერიტორიაზეა. საოკუპაციო რეჟიმმა მას ორთვიანი პატიმრობა შეუფარდა.

გაფრინდაშვილის საკითხი საოკუპაციო რეჟიმთან განიხილეს ჟენევის დისკუსიების თანათავმჯდომარეებმაც. ოკუპირებული ცხინვალის რეგიონის დე ფაქტო პრეზიდენტმა, ბიბილოვმა განაცხადა, რომ გაფრინდაშვილის მიერ ე.წ. საზღვრის კვეთა ქართული პროვოკაციული პოლიტიკის გაგრძელებაა.