საპატრულო პოლიციის უფროსი, ვაჟა სირაძე ამბობს, რომ პარლამენტში ცეცხლსასროლი იარაღი არ არის. დღეს, 17 ნოემბერს პარლამენტთან საპროტესტო აქცია გაიმართება. ტელეკომპანია მთავარმა გაავრცელა კადრები, რომელშიც ჩანს, რომ საკანონმდებლო ორგანოს შენობაში პოლიციაა მობილიზებული და იარაღია განლაგებული.

როგორც ვაჟა სირაძემ ჟურნალისტებს უთხრა, პარლამენტის შენობაში განსაკუთრებულ დავალებათა დეპარტამენტი იმყოფება, რომლებიც საზოგადოებრივი წესრიგის დაცვისთვის არიან:

"განსაკუთრებულ დავალებათა დეპარტამენტს აქვს თავისი აღჭურვილობა, არავითარი ცეცხლსასროლი იარაღი ადგილზე არ არის. თქვენ შეიძლება ვერ ერკვევით", — უთხრა სირაძემ ჟურნალისტებს.

საპროტესტო აქცია პარლამენტის წინ შუადღით, სამ საათზე უნდა გაიმართოს. აქციის ორგანიზატორი სხვადასხვა სამოქალაქო მოძრაობა და ოპოზიციური პარტიაა. გარდა ამისა, პატრიოტთა ალიანსის ორგანიზებით საპროტესტო აქცია გაიმართება რესპუბლიკის მოედანზე.