რამდენიმე საათის წინ იტალიის ქალაქ ვენეციას მისი არსებობის ისტორიაში ერთ-ერთი ყველაზე ძლიერი წყალდიდობა დაატყდა თავს, რამაც ქალაქის მნიშვნელოვანი ნაწილის დატბორვა გამოიწვია.

ქალაქის დატბორილ უბნებში წყლის სიმაღლემ 1.87 მეტრს მიაღწია, რაც ბოლო ორმოცდაათი წლის განმავლობაში ყველაზე მაღალი მაჩვენებელია. ამაზე რეკორდული შედეგი მხოლოდ 1966 წელს ფიქსირდება, როცა დატბორვისას წყლის სიმაღლე 1.94 მეტრს უდრიდა.

ფოტო: Manuel Silvestri/Reuters

ადგილობრივი მედიის ცნობით, სტიქიას მსხვერპლი მოჰყვა, მათ შორის ერთ-ერთია ქალაქის 78 წლის მაცხოვრებელი, რომელიც წყალში დაზიანებული ელექტროგაყვანილობის მოხვედრამ იმსხვერპლა.

ფოტო: Stefano Mazzola/Awakening/Getty Image

განსაკუთრებული ზიანი მიადგა, როგორც საცხოვრებელ სახლებს, ისე კაფეებს, რესტორნებსა და ტურისტულ ადგილებს - მათი უმეტესობა დაიტბორა და ავეჯის დიდი ნაწილი დაზიანდა.

ფოტო: Stefano Mazzola/Awakening/Getty Images

დატბორვის შედეგად წყლის მაჩვენებელი განსაკუთრებით მაღალი ქალაქის ერთ-ერთ ყველაზე დაბალ ნაწილში, წმინდა მარკოზის მოედანზე დაფიქსირდა, რის გამოც მნიშვნელოვნად დაზიანდა ვენეციის ერთ-ერთი ყველაზე ძველი ისტორიული ძეგლი - წმინდა მარკოზის ბაზილიკა.

ფოტო: AFP

როგორც ცნობილია, ამ ტაძრის არსებობის 1200-წლიანი ისტორიის განმავლობაში, ის მხოლოდ ხუთჯერ დაიტბორა და ამჟამანდილი შემთხვევა მეექვსეა, რაც ამ სიძველის ისტორიულ ძეგლს დიდ საფრთხეს უქმნის.

ფოტო: Luca Bruno

სამაშველო სამსახურებთან ერთად ადგილობრივი მოსახლეობა შიშველი ხელებით ცდილობს დატბორილ შენობებში ზარალი შეამციროს.

ფოტო: Miguel Medina/AFP/Getty Images

Twitter-ის ანგარიშზე ვენეციის მერმა, ლუიჯი ბრუნიარომ ამ ფაქტთან დაკავშირებით განცხადება გაავრცელა:

"არსებული სიტუაცია მეტად დრამატულია. მთავრობას უკვე ვთხოვეთ დახმარება, მაგრამ ზარალი მაინც ძალიან დიდი იქნება. აი, ეს არის კლიმატის ცვლილების შედეგი."

ფოტო: Stefano Mazzola/Awakening/Getty Images

2003 წლიდან ვენეციაში ინფრასტრუქტურული სამუშაოები მიმდინარეობს, რომლის მიზანიც მსგავსი სტიქიებისგან ქალაქის დაცვაა, თუმცა, როგორც ჩანს, ეს ყველაფერი ჯერ კიდევ არაა საკმარისი.

ფოტო: Reuters