And Then We Danced-ს არანაირი კავშირი პორნოგრაფიასთან არ აქვს. ამის შესახებ On.ge-ს კინოცენტრის დირექტორმა, გაგა ჩხაიძემ განუცხადა.

On.ge ამ საკითხით მას შემდეგ დაინტერსდა, რაც შინაგან საქმეთა სამინისტრომ ამ საკითხის შესწავლა დაიწყო, კინოცენტრი კი ის უწყებაა, რომელმაც ორი მსახიობი ავიაბილეთებით უზრუნველყო.

"პორნოგრაფია? არანაირი კავშირი ფილმს პორნოგრაფიასთან არ აქვს. პორნოგრაფია სხვა რამ არის, თუ გაერკვევიან კარგი იქნება", — ამბობს გაგა ჩხაიძე.

მისი თქმით, ფილმში სექსის სცენის არსებობა არ ნიშნავს, რომ პორნოგრაფიაა. ჩხაიძე ამბობს, რომ 21-ე საუკუნეში თითქმის ყველა მხატვრული ფილმი შეიცავს ეროტიკის ან სექსის სცენებს:

"პორნოგრაფიაში მთავარი არის სქესობრივი კავშირი. მხატვრულ ფილმში, სადაც სექს სცენა იყოს არ ჩაითვლება პორნოგრაფიად. მხატვრულ ფილმში მთავარი არის სხვა და არა სექსუალური კავშირი".