პრეზიდენტი სალომე ზურაბიშვილის თქმით, ის სამებაში საკვირაო წირვაზე პატრიარქის თანადგომისთვის მივიდა, რადგან ეს მისი როგორც პრეზიდენტის, ისე პიროვნული მოვალეობაა.

"პატრიარქის შეურაცხყოფა არის ერის შეურაცხყოფა, არის ჩვენი კულტურის, ტრადიციების, შეურაცხყოფა. არის შეურაცხყოფა იმ ისტორიის, რომელზეც დგას საქართველო და საქართველოს დამოუკიდებლობა. ამიტომ მე მოვედი დღეს იმ თანადგომით, რომელიც არის პრეზიდენტის სრული მოვალეობა და ჩემი პერსონალური, პირადული გამოხატულება ამ თანადგომის", — განაცხადა პრეზიდენტმა ჟურნალისტებთან.

დღეს, 3 ნოემბერს, სინოდის სხდომიდან მესამე დღეს საქართველოს პატრიარქმა, ილია მეორემ სამებაში საკვირაო წირვა ჩაატარა, თუმცა ქადაგებაზე უარი თქვა. მან მრევლს მხოლოდ რამდენიმე წინადადებით მიმართა.

"დღეს მე ქადაგება არ მექნება, შეგონება მექნება... გაუფრთხილდით სამშობლოსა და ეკლესიას, ამაშია ქართველი ერის ძალა... მადლობელი ვარ თანადგომისათვის, თანადგომა გამოიჩინეს სხვა რელიგიების წარმომადგენლებმაც, გაიხარეთ", — თქვა ილია მეორემ და გვარები დალოცა.

31 ოქტომბერს გამართული სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი".

მეუფე პეტრემ განმარტა, რომ სიტყვა "პიდარასტიაში" "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

სინოდის სხდომის განჩინებით, პეტრე ცაავას აეკრძალა მღვდელმოქმედება, გათავისუფლდა სინოდის წევრობიდან და ჭყონდიდის ეპარქიის ხელმძღვანელობიდან და "მოსანანიებლად" მონასტერში იქნა გამწესებული. მეუფე პეტრე შეიომღვიმეში წასვლაზე უარს აცხადებს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.