სინოდის სხდომის დაწყებამდე, რომელიც მუფე პეტრესთვის მღვდელმსახურების შეჩერებით და პატრიარქისადმი ბრალდებებით დასრულდა, ილია მეორემ განაცხადა, რომ არა ვინმეს დასასჯელად, არამედ ერთმანეთის დასახმარებლად იყვნენ შეკრებიი. პატრიარქის სიტყვები სინოდის სხდომის ოქმში წერია.

"ჩვენ კი არ უნდა დავუმძიმოთ ერთმანეთს ტვირთი, არამედ უნდა შევუმსუბუქოთ. მიუხედავად იმისა, რომ ჩემთვის არაერთხელ დაუმძიმებიათ ჯვარი, მე არასოდეს მიფიქრია ვინმეს დასჯა. მე მუდამ მხოლოდ თქვენს დახმარებაზე ვფიქრობ", — განაცხადა პატრიარქმა.

გარდა ამისა, პატრიარქმა ისაუბრა სინოდის მღვდელმთავართა პასუხისმგებლობის შესახებ, ღვთისა და მამულის წინაშე.

"ჩვენ ყველაფერი უნდა გავაკეთოთ, როგორც ეკლესიაში, ასევე ქვეყანაში მშვიდობის დამკვიდრებისათვის. ჩვენ არ უნდა მივცეთ საბაბი საზოგადოებას დაბრკოლდეს ეკლესიისა და სარწმუნოების მიმართ", — განაცხადა მან.

ილია მეორე ფიქრობს, რომ "დროის სირთულიდან გამომდინარე" მხოლოდ წელიწადში ორჯერ სინოდის შეკრება საკმარისი არ არის. მისი თქმით, სინოდი ყოველი პრობლემის შემთხვევისას უნდა შეიკრიბოს.

დღევანდელი სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი". მეუფე პეტრემ განმარტა, რომ სიტყვა "პიდარასტიაში" "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

სინოდის განცხადებით, მეუფე პეტრეს ცოდვის მონანიებლობის გამო შეუჩერეს მღვდელმსახურების უფლება.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.