საქართველოს პარლამენტის თავმჯდომარე, დავით უსუფაშვილი კამპანია ეს შენ გეხებას წარმომადგენლებს შეხვდა.

მხარეებმა კამპანიის იმ საკანონმდებლო ინიციატივებზე ისაუბრეს, რომლებიც სახელმწიფო უსაფრთხოების სამსახურზე საპარლამენტო კონტროლის გაძლიერების მექანიზმებს, ფარული მიყურადების საკითხის დარეგულირებასა და დამოუკიდებელი საგამოძიებო მექანიზმის შექმნას ეხება.

შეხვედრის შემდეგ უსუფაშვილმა განმარტა, რომ ერთ-ერთი კანონპროექტი უშიშროების სამსახურზე საპარლამენტო კონტროლის გაძლიერების მექანიზმებს ეხება, რომლის განხორციელბაზეც პარლამენტმა სურვილი და მზაობა თავად გამოთქვა:

"ჩვენ ძალიან მნიშვნელოვანი ნაბიჯი გადავდგით წინ: შინაგან საქმეთა სამინისტროს გამოეყო უშიშროების სამსახური. იქვე ვთქვით, რომ ეს გამოყოფა არის რეფორმის პირველი ნაბიჯი".

პარლამენტის თავმჯდომარემ მეორე კანონპროექტიც შეაფასა და განაცხადა, რომ მოსმენების თემის საკითხის გადაწყვეტა 2017 წლისთვის არის დაგეგმილი:

„მეორე საკითხი ეხება მოსმენების თემას, რომელზეც საკონსტიტუციო სასამართლომ მიიღო გადაწყვეტილება და 2017 წლის მარტიდან ის მოდელი, რომელიც კანონშია, დაკარგავს ძალას და პარლამენტი, უბრალოდ, ვალდებული ვართ, მივიღოთ შესაბამისი ზომები".

პარლამენტის თავმჯდომარის შეფასებით, მესამე პროექტი, რომელიც დამოუკიდებელი საგამოძიებო ორგანოს შექმნას ეხება და რომელიც შეისწავლის სამართალდამცავების მხრიდან ჩადენილ შესაძლო დანაშაულს, რთული და კარგად შესასწავლია, რადგან ის სამართალდამცავ სისტემას ეხება:

"მგონია, რომ ასეთ რეფორმას სჭირდება გაცილებით მეტი და მყარი პოლიტიკური მხარდაჭერა, ვიდრე ეს შეიძლება ჰქონდეს მიმავალ პარლამენტს. ვთხოვე ავტორებს, რომ მეტი მასალა მომაწოდონ, რომ გავეცნო უფრო კარგად“.

NGO-ების მიერ წარმოდგენილი 3 კანონპროექტი მოიცავს:

  • დამოუკიდებელი სააგენტოს შექმნას, რომელიც ფარულ საგამოძიებო მოქმედებებს დაარეგულირებს და ანგარიშვალდებული მხოლოდ პარლამენტის წინაშე იქნება.
  • დამოუკიდებელი საგამოძიებო ორგანოს შექმნას, რომელიც შეისწავლის სამართალდამცავების მხრიდან ჩადენილ შესაძლო დანაშაულს.
  • სახელმწიფო უსაფრთხოების სამსახურში რეფორმების განხორციელებას, ე.წ. ოდეერის ინსტიტუტის გაუქმებასა და უსაფრთხოების სამსახურზე პარლამენტის კონტროლის გაძლიერებას.