საზოგადოებრივი მოძრაობა ლელოს დამფუძნებელი, მამუკა ხაზარაძე ეკონომიკის ყოფილი მინისტრის გიორგი ქობულიას სიტყვებს ეხმაურება, რომელმაც თქვა, რომ ანაკლიის პროექტს ანალიტიკა აკლდა.

"ქობულიას ან კომპეტენტურობა აკლია, რადგან არ იცნობს პროექტს, ან ახმოვანებს იმ რუსულ ძალებს, რომელთაც ჩვენს ქყევანაში ანაკლიის პროექტის განხორციელება არ უნდათ. მინისტრი რომ იყო, სად იყო? მივედი ერთხელ ქობულიასტან გვინდოდა ჭაობების ყიდვა და ისევე დარჩე ეს საუბრად და იმის მერე ქობულია საერთოდ არ მინახავს", — განაცხადა ხაზარაძემ გადაცემა რეაქციაში.

ყოფილი ეკონომიკის მინისტრი გიორგი ქობულია აცხადებს, რომ ანაკლიის პორტის პროექტის მთავარი შეცდომა ანალიტიკის არარსებობა იყო. მისი თქმით, მთავრობაში ყოფნისას გაუჩნდა ეჭვი, თუ რატომ ვერ აგროვებდა პროექტი საჭირო თანხას, ამიტომ კონსორციუმისგან და საპარტნიორო ფონდისგან გამოითხოვა დამასაბუთებელი ანალიზი, თუ რატომ არის პორტი მომგებიანი.

ქობულია ამბობს, რომ პასუხი 3 თვის განმავლობაში ვერ მიღო და პირადად შექმნა გუნდი, რომელიც საბუთებს ეძებდა. მინისტრის თქმით, პორტის კონკურენტუნარიანობის დასაბუთება ვერც ასე მოიპოვა. მისივე თქმით, ამან გაუმტკიცა ეჭვი, რომ პროექტის ეკონომიკურ ნაწილს პრობლემები ჰქონდა.

"მე ნალაპარაკები მაქვს ინვესტორებთან, რომლებმაც თქვეს, რომ ვერ დაიჯერეს ამ პროექტის ეკონომიკის. ამას ერთვის თან უმძიმესი განცხადება საფინანსო ინსტიტუტების, რომლებიც ვითომ თავიდან მზად იყვნენ დაეფინანსებინათ 400 მილიონით, რომ ვერ მოიძიეთ პორტის ეკონომიკური დასაბუთება. ისინი ითხოვდნენ მთავრობას მიეცა გარანტიები", — განაცხადა ქობულიამ მთავარი არხის ეთერში.

ანაკლიის პორტის გაურკვეველი მომავალი

ანაკლიის პორტის სამომავლო განხორციელებასთან დაკავშირებით კითხვები თიბისი ბანკის საქმემ გააჩინა. თიბისი ჰოლდინგ საქართველო ანაკლიის განვითარების კონსორციუმის წევრია. მას შემდეგ, რაც პროკურატურამ ფულის შესაძლო გათეთრებასთან დაკავშირებით გამოძიება დაიწყო თიბისი ბანკის სამეთვალყურეო საბჭოს წევრებმა, ბადრი ჯაფარიძემ და მამუკა ხაზარაძემ ივარაუდეს, რომ ეს პროცესები ანაკლიის პორტის პროექტის ჩაშლისკენ იყო მიმართული. პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს.

ამ საქმესთან დაკავშირებით 13 თებერვალს საქართველოს ეროვნულმა ბანკმა თიბისი ბანკში მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

ეროვნული ბანკის მოთხოვნის შემდეგ კომპანიის საბაზრო კაპიტალიზაცია 7,29 პროცენტით შემცირდა, რეალურ თანხაში ეს მაჩვენებელი 55 მილიონზე მეტი გირვანქა სტერლინგია.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭვირვალობაზე.

მოგვიანებით, მაშინდელმა ეკონომიკის მინისტრმა, გიორგი ქობულიამ თქვა, რომ თიბისის დამფუძნებლების, მამუკა ხაზარაძისა და ბადრი ჯაფარიძის ირგვლივ შექმნილი ნეგატიური ფონი, კერძო ინვესტორებს "მინიმალური კაპიტალის" შეგროვებას ურთულებს "ანაკლიის პროექტის დასაძრავად".

შემდგომში უკვე მამუკა ხაზარაძემ და ბადრი ჯაფარიძემ ანაკლიის პორტის მმართველ საბჭოში თავმჯდომარისა და თავმჯდომარის მოადგილის პოსტები დატოვეს.

2019 წლის აგვისტოში ანაკლიის განვითარების კონსორციუმი ერთ-ერთმა მთავარმა ინვესტორმა, ამერიკულმა კონტი ჯგუფმა დატოვა. კონსორციუმის აღმასრულებელი დირექტორი, ლევან ახვლედიანი აცხადებდა, რომ კონტი ჯგუფის გასვლა პროექტს მნიშვნელოვნად არ დააზიანებს. მისივე თქმით, ბოლო პერიოდში კონტი ჯგუფს ისედაც ძალიან პასიური როლი ჰქონდა.

ამავე თემაზე: