18 ოქტომბერს, ილიას სახელმწიფო უნივერსიტეტში, ქართული წიგნის ეროვნული ცენტრის მოწვევითა და ილიას სახელმწიფო უნივერსიტეტის ორგანიზებით, მწერალ ბორის აკუნინთან, იგივე გრიგოლ ჩხარტიშვილთან, შეხვედრა გაიმართება.

ფოტო: ილიას სახელმწიფო უნივერსიტეტი

აკუნინი, რომელიც დღეისათვის ყველაზე პოპულარული ქართული წარმოშობის რუსი მწერალი, ლიტერატურათმცოდნე, იაპონისტი და მთარგმნელია, 1956 წელს საქართველოში, ზესტაფონში, დაიბადა. 1958 წელს ჩხარტიშვილების ოჯახი საცხოვრებლად მოსკოვში გადავიდა, სადაც მწერალი გაიზარდა. სწავლობდა რუსეთში, ისტორია-ფილოლოგიის ფაკულტეტზე, აქვს ისტორიკოს–იაპონიისმცოდნის დიპლომი. არის მხატვრული ლიტერატურის მთარგმნელი ინგლისური და იაპონური ენებიდან. გამოქვეყნებული აქვს როგორც ესეისტიკა (მწერალი და თვითმკვლელობა, 1999), ისე ისტორიული ჟანრის ნაწარმოებები (რუსეთის სახელმწიფოს ისტორია, 2013-იდან დღემდე).

პირველი მხატვრული ნაწარმოები ბორის აკუნინის სახელით 1998 წელს გამოაქვეყნა. განსაკუთრებული პოპულარობა მწერალს ისტორიულ-დეტექტიური რომანების სერიამ მოუტანა ერასტ ფანდორინზე. მისი რომანები თარგმნილია მრავალ ენაზე და გადაღებულია რამდენიმე ეკრანიზაციაც.

აღსანიშნავია, რომ მკითხველთან შეხვედრის შემდეგ მწერალს ილიას სახელმწიფო უნივერსიტეტის საპატიო დოქტორის წოდება მიენიჭება.

ასევე იხილეთ ინტერვიუ: ბორის აკუნინი: რუსეთს ყაენი მართავს