გამოცემა ლიბერალის ძველი გუნდი ახალ მედიას ქმნის, რომელსაც პუბლიკა ერქმევა. საიტი ერთ კვირაში ჩაეშვება, ფეისბუქგვერდი კი უკვე ხელმისაწვდომია. ლიბერალის გუნდმა გამოცემის დატოვების შესახებ 23 ივნისს განაცხადა, ამის მიზეზად კი მფლობელთან, შორენა შავერდაშვილთან შეუთანხმებლობა დაასახელა.

გამოცემა პუბლიკის ერთ-ერთი დამფუძნებელი, ზურა ვარდიაშვილი On.ge-სთან ამბობს, რომ Publika.ge მკითხველს შესთავაზებს ახალ ამბებს, სტატიებს, ფოტო-ვიდეო მასალას, აუდიოკონტენტს, ბლოგებს, თვალსაზრისებს, სიღრმისეულ რეპორტაჟებს, ანუ ყველა სახის მედიაკონტენტს, რომელიც ინფორმირებულ მოქალაქეს სჭირდება.

"სტრუქტურული განსხვავება ისაა, რომ გამოცემა დაფუძნებულია თავად მასში მომუშავე ჟურნალისტების მიერ, სადაც გადაწყვეტილებებს იღებს დამფუძნებელი საბჭო (აღმასრულებელი სტრუქტურის მეშვეობით) და არა ერთი ან რამდენიმე მფლობელი. ეს მოდელი თავისი დემოკრატიულობით გიცავს სხვადასხვა სახის ბიზნეს თუ პოლიტიკური გავლენებისგან", — ამბობს ვარდიაშვილი.

მისი თქმით, გამოცემისთვის პრიორიტეტი ოპერატიულად მომზადებული მედიაკონტენტი იქნება:

"თუმცა, ის აქცენტს უფრო სიღრმისეულ მასალებზე და კითხვებზე: როგორ და რატომ დასვამს".

ვარდიაშვილი აცხადებს, რომ როგორც ლიბერალში, აქაც მათთვის პრიორიტეტი ადამიანის უფლებები, სამართალი, სოციალური თემატიკა, განათლება, გარემო, შრომითი უფლებები და უმცირესობები იქნება. მისივე თქმით, გარდა ამისა, იქნება ინტელექტუალურ/თავშესაქცევი რუბრიკებიც — ლიტერატურა, კულინარია, ქვიზები და ა.შ.

კითხვაზე, რატომ გახდა საჭირო ახალი მედიის დაფუძნება და არა ჟურნალისტების სხვადასხვა მედიებში გადანაწილება, ვარდიაშვილი პასუხობს, რომ ამ ტიპის მედია, როგორიც პუბლიკა იქნება, ქართულ მედიაგარემოს აკლია.

"მიუხედავად იმისა, რომ ონლაინსივრცე ლამისაა წალეკოს საინფორმაციო ვებგვერდებმა, მხოლოდ თითებზე ჩამოსათვლელია სანდო, კვალიფიციური, დასავლურ ღირებულებებზე ორიენტირებული მედიაგამოცემები... ვფიქრობთ, სწრაფად დავიკავებთ ადგილს იმ მედიების გვერდით, რომელსაც თითებზე ჩამოსათვლელი ვუწოდე. ჩვენ ამის გამოცდილება გვაქვს", — დასძენს ვარდიაშვილი.

ლიბერალის მაშინდელი გუნდი განცხადებაში აღნიშნავდა, რომ შავერდაშვილს არ მოსწონდა ლიბერალის პოზიციონირება, მათ დაუანონსა საკადრო ცვლილებები, მისი ნდობით აღჭურვილი მმართველის დანიშვნა და ახალი სარედაქციო ხედვის ჩამოყალიბება.