სულ ცოტა ხნის წინ გიგანტ კომპანიებს შორის გამართულ ერთგვარ აუქციონზე, Lionsgate-სა და Sony-ს Paramount Studios-მა აჯობა და ახალი პროექტის წარმოების უფლება მოიპოვა. თუ გავითვალისწინებთ იმას, კინოინდუსტრიის როგორი მნიშვნელოვანი მოთამაშეებიც იბრძოდნენ მის მოსაპოვებლად, მაშინ აქედანვე შეგვიძლია ვივარაუდოთ, რომ წინ საკმაოდ საინტერესო კინოსურათი ელოდება მაყურებელს.

Imaginary Friends - ასე ერქმევა ფილმს, რომლის სიუჟეტიც ერთი უცნაური მთავარი გმირის ირგვლივ განვითარდება: მას წარმოსახვითი მეგობრები ჰყავს, რომელთაც ხედავს და ესაუბრება, თუმცა შემდეგ მათთან პრობლემები ექმნება. სწორედ ამ პერსონაჟის როლს შეასრულებს რაიან რეინოლდსი, რომელსაც უკვე კარად იცნობენ მაყურებლები დედპულის ფილმებით.

ამ კომედიური ფენტეზის რეჟისორი ჯონ კრასინსკი იქნება, რომელმაც ბოლო პერიოდში სახელი თავისი საშინელებათა ჟანრის ფილმით A Quiet Place გაითქვა. რეჟისორობასთან ერთად კრასინსკი ახალი ფილმის სცენარისტი, პროდიუსერი და მსახიობიც იქნება.

ფილმის შესახებ სხვა დეტალები ჯერ-ჯერობით უცნობია, თუმცა მის გამოსვლას, ალბათ, 2021 წელს უნდა ველოდოთ.