თბილისის საკრებულოს დეპუტატის, ილია ჯიშკარიანი სასამართლო პროცესი საავადმყოფოში გაიმართება. პროცესზე ჯიშკარიანი აღკვეთი ღონისძიება უნდა განიხილონ.

ილია ჯიშკარიანი რამდენიმე დღეა, რაც საავადმყოფოში იმყოფება. ამ ხნის განმავლობაში ის მედიასთან ურთიერთობაზე უარს აცხადებდა. გუშინ, 10 ოქტომბერს რუსთავი 2-მა გაავრცელა ვიდეო, რომელშიც დეპუტატი ყველა ბრალდებას უარყოფს.

კავშირი საფარის აღმასრულებელი დირექტორი, ბაია პატარაია ამბობს, რომ სექსუალურ ძალადობაში დადანაშაულებული ქართული ოცნების დეპუტატისთვის პროკურატურა მხოლოდ გირაოს ითხოვს. თამთა თოდაძის ადვოკატის თქმით, ის თავად ესაუბრა პროკურორს, რომელმაც დაუდასტურა, რომ გეგმავენ ჯიშკარიანისთვის 30 ათასი ლარის ოდენობის გირაოს მოთხოვნას. ადვოკატის თქმით, მათ მიმართეს მთავარ პროკურორს, შალვა თადუმაძეს, პირად კონტროლზე აიყვანოს ეს საქმე.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

თოდაძის თქმთ, ჯიშკარიანმა მასზე 30 სექტემბერს იძალადა, თუმცა ამ დრომდე მას დაზარალებული სტატუსი არ ჰქონდა მინიჭებული. ამის მიზეზად პროკურატურა ექსპერტიზის დასკვნის არარსებობას ასახელებდა.

6 ოქტომბერს თოდაძემ მთავარი არხის ეთერში მომხდარზე ღიად ისაუბრა, მეორე დღეს კი პროკურატურასთან მისი მხარდამჭერი აქცია გაიამართა. 8 ოქტომბერს მისმა უფლებადამცველმა პროკურატურას დაზარალებულის სტატუსის მისანიჭებლად ისევ მიმართა, საღამოს კი ცნობილი გახდა, რომ პროკურატურამ ილია ჯიშკარიანს ბრალი წარუდგინა და ქალი დაზარალებულად ცნო.