თამთა თოდაძე, ქალი, რომელიც სექსუალურ ძალადობაში ადანაშაულებს ქართული ოცნების დეპუტატს, შემთხვევის დღეს იხსენებს. ამბობს, რომ ძალადობის ფაქტი სამუშაო საათებში მოხდა.

"ჩამეხუტე, მეუბნება და ამ ჩახუტების მერე იწყებს კისერში კოცნას, მოწიე თავი, მოდი გაკოცო. არ ვიცი, როგორ დავაღწიო თავი, მარტოები ვართ, კარი ჩაკეტილია. გვერდით ტელეფონი დავინახე, ვეუბნები, იცოდეთ ბატონო ილია, გამიშვით, თორემ ვიღებ. ეს რომ ვთქვი, ტელეფონს ხელი დავავლე და ძირს დამაგდო. ტელეფონი გამომტაცა და ხუთჯერ მაინც დაახეთქა ძირს წინა მხრიდან. არ დამავიწყდება მისი ქედმაღლური მზერა, აბა სად არის შენი მტკიცებულებები? სად არის ის მასალები რაზეც მეუბნებოდი? დამარტყა ფეხი და ეს ფიზიკურ დაპირისპირებაში გადაიზარდა. ვცდილობ, დავუსხლტე ხელიდან და ამ დროს დაიმტვრა კომპიუტერის მონიტორი, პრინტერი...", — ყვება თამთა თოდაძე TV პირველზე, ვახო სანაიასთან ინტერვიუში.

სავარაუდო მსხვერპლი იხსენებს, რომ გამოქცევის დროს ხელიდან სისხლი მოსდიოდა, რაც ქუჩაში სხვადასხვა ობიექტის კამერას უნდა დაეფიქსირებინა. მისი თქმით, სახლში მისვლისთანავე დედას ტელეფონიდან დარეკა პოლიციაში, მისი ფსიქოლოგიური მდგომარეობიდან გამომდინარე კი, თავად პატრულმა დაურეკა სასწრაფო სამედიცინო დახმარებას.

თამთა ამბობს, რომ პოლიციის თანამშრომლები შემთხვევის ადგილზე დაგვიანებით მივიდნენ. მისი თქმით, დილის 3 საათზე დაათვალიერეს ოფისი, როდესაც ყველაფერი შუადღის საათებში მოხდა.

დეპუტატმა ილია ჯიშკარიანმა სატელეფონო ინტერვიუსას განაცხადა, რომ "შეუძლოდაა და ვერაფერს იტყვის". შინაგან საქმეთა სამინისტრომ გამოძიება სამი მუხლით დაიწყო.

ამავე თემაზე: