კავშირს საფარის აღმასრულებელი დირექტორი, ბაია პატარაია ამბობს, რომ სექსუალურ ძალადობაში დადანაშაულებული ქართული ოცნების დეპუტატისთვის, ილია ჯიშკარიანისთვის პროკურატურა მხოლოდ გირაოს ითხოვს. თამთა თოდაძის ადვოკატის თქმით, ის თავად ესაუბრა პროკურორს, რომელმაც დაუდასტურა, რომ გეგმავენ ჯიშკარიანისთვის 30 ათასი ლარის ოდენობის გირაოს მოთხოვნას. ადვოკატის თქმით, მათ მიმართეს მთავარ პროკურორს, შალვა თადუმაძეს, პირად კონტროლზე აიყვანოს ეს საქმე.

ამის შესახებ მათ დღეს, 11 ოქტომბერს ბრიფინგზე ისაუბრა. ბაია პატარაიამ აღნიშნა, რომ ეს არის უპრეცენდენტო, როდესაც მძიმე დანაშაულისთვის ითხოვენ გირაოს

"ამ საქმეში ილია ჯიშკარიანმა ერთხელ უკვე წაშალა დანაშაულის კვალი, როდესაც თავის ცოლსა და დამლაგებელი ქალებს პირწმინდად დაალაგებინა დანაშაულის სცენა. მან სცადა ზეწოლა მოეხდინა მოწმეებზე, როდესაც მიუგზავნა ადამიანი მოსალაპარაკებლად. ილია ჯიშკარიანი არის გავლენიანი პოლიტიკოსი, მას აქვს მფარველობა, როგრც ქალაქის მერის, ასევე, ოცნების მაღალჩინოსნებისაგან".

დღეს, 11 ოქტომბერს ილია ჯიშკარიანისთვის აღკვეთი ღონისძიების შეფარდებისთვის სხდომა ჩაინიშნა. On.ge დაუკავშირდა პროკურატურას, თუ რა სახის აღკვეთს ითხოვს ბრალდება, თუმცა პრესსამსახურში ამბობენ, რომ პროკურორი ადგილზე განმარტავს ამის შესახებ.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

თოდაძის თქმთ, ჯიშკარიანმა მასზე 30 სექტემბერს იძალადა, თუმცა ამ დრომდე მას დაზარალებული სტატუსი არ ჰქონდა მინიჭებული. ამის მიზეზად პროკურატურა ექსპერტიზის დასკვნის არარსებობას ასახელებდა.

6 ოქტომბერს თოდაძემ მთავარი არხის ეთერში მომხდარზე ღიად ისაუბრა, მეორე დღეს კი პროკურატურასთან მისი მხარდამჭერი აქცია გაიამართა. 8 ოქტომბერს მისმა უფლებადამცველმა პროკურატურას დაზარალებულის სტატუსის მისანიჭებლად ისევ მიმართა, საღამოს კი ცნობილი გახდა, რომ პროკურატურამ ილია ჯიშკარიანს ბრალი წარუდგინა და ქალი დაზარალებულად ცნო.

11 სექტემბერს სექსუალურ ძალადობაში დადანაშაულებულ ილია ჯიშკარიანს სასამართლომ 10 ათასი ლარის ოდენობის გირაო შეუფარდა. მასვე საქმეზე დაკითხულ მოწმეებთან ნებართვის გარეშე კომუნიკაცია და დაზარალებულ თამთა თოდაძესთან მიახლოება აეკრძალა.