26 წლის მამუკა ხილაძე ბათუმის საზღვაო უნივერსიტეტის მესამე კურსზე სწავლობს, მისი მომავალი პროფესია გემის მექანიკოსია. სწავლის გადასახადის დასაფარად, რომელიც 2 200 ლარს შეადგენს, ის სხვადასხვა ადგილას მუშაობდა, მათ შორის ბათუმში - შეზლონგების გამქირავებლად და ასევე თურქეთში.

მამუკა პროფესიით მაშველი არაა, თუმცა ადამიანების დასახმარებლად მას ეს არ სჭირდება:

"არ ვარ პროფესიონალი მოცურავე, მაგრამ სიამოვნებით გავხდებოდი, რადგან როცა დასჭირდებათ ადამიანებს ჩემი დახმარება, არ გამიჭირდეს. ტალღები მიყვარს და არ მაშინებს".

სწორედ ასე მოხდა 2019 წლის 23 აგვისტოს, როდესაც მან შტორმის დროს ზღვაში შესული სამი არასრულწლოვანი წყლიდან გამოიყვანა და გადაარჩინა. ამ დღეს მამუკა On.ge-სთან იხსენებს:

"ერთ დღეს ტალღების გამო ზღვაში შესვლა აკრძალული იყო. ხალხისგან გავიგონე ხმა, ვიღაც იხრჩობაო. იმწამსვე ყველაფერი მივატოვე და შევცურე საშველად. როგორც კი ამოვიყვანე, ცოტა ხნის შუალედში მამამ დამიძახა, კიდევ ბავშვი იხრჩობაო და ისევ დაუფიქრებლად შევცურე და გამოვიყვანე. ოღონდ ეს ცოტათი გამიჭირდა სხვებთან განსხვავებით. ცოტახნის შუალედში ისევ მოხდა მესამე შემთხვევა, ისევ შევცურე და გამოვიყვანე".

მამუკას სიტყვებით, ეს პროცესი ერთ-ერთმა დამსვენებელმა ფეისბუქზე გამოაქვეყნა, რის შემდეგაც მას უამრავი ადამიანი გამოეხმაურა. მას აჭარის მთავრობის თავმჯდომარე თორნიკე რიჟვაძეც დაუკავშირდა, ახალგაზრდულ რეგიონალურ ცენტრში სამსახური შესთავაზა და სიგელიც გადასცა.

"ჩემთვის ეს მოულოდნელი იყო, რადგან არაერთხელ გამომიყვანია და გადამირჩენია ხალხი, მაგრამ ეს არასდროს გახმაურებულა. ამ ადამიანს ძალიან დიდ მადლობას ვუხდი, ყველაფერი მისით დაიწყო და მისით გამიცნო ხალხმა".

თორნიკეს თქმით, უნივერსიტეტისგან მიღებული დაფინანსება მისთვის არანაკლებ მოულოდნელი და სასიხარულო იყო.

იმის მიუხედავად, რომ თავად იმსახურებს უსაზღვრო მადლიერებას გამოჩენილი სიმამაცის და შეუფასებელი რამის, ადამიანების სიცოცხლის გადარჩენის გამო, მამუკა გამოხმაურებისთვისა და დაფასებისთვის თავადაა მადლიერების გრძნობით სავსე.