გუშინ, 30 სექტემბერს მთავარი არხის საინფორმაციო გამოშვება მთავარმა რუსთავი 2-ის საინფორმაციო გამოშვება კურიერს მოუგო. ორივე საინფორმაციო გამოშვება ერთსა და იმავე დროს, საღამოს 9 საათზე გავიდა. მონაცემები On.ge-ს თი-ვი ემ-არ საქართველომ მიაწოდა.

გუშინ (18+ სამიზნე აუდიტორიისთვის) საშუალო დღიური AMR (ყველა მაყურებლიდან რა წილი უყურებდა არხს დროის მოცემულ მონაკვეთში) მთავარ არხს 5,15 პროცენტი ჰქონდა, კურიერს — 4,03 პროცენტი. გასულ საღამოს SHARE (ჩართული ტელევიზიების წილი დროის მოცემულ მონაკვეთში) მთავარის 12,97 პროცენტი, კურიერის კი 10,23 პროცენტი იყო.

მთავარის გუშინდელ გამოშვებაში სიუჟეტები მიეძღვნა თბილისში სახლის დაყაჩაღებას; რა დროსაც ქალი "დააუთოვეს"; წყალტუბოს ტრაგედიას; ვაკეში მომხდარ სისხლიან დაპირისპირებას; მამუკა ხაზარაძესთან ინტერვიუს და ბიძინა ივანიშვილის შეხვედრას პარტაქტივთან.

რაც შეეხება კურიერს, სიუჟეტები იყო ვაკეში მომხდარი სისხლიანი დაპირისპირების შესახებ. ასევე, ეთერში გავიდა სიუჟეტი შიდა ქართლში არასრულწლოვანთან გარყვნილი ქმედების შესახებ, წყალტუბოს ტრაგედიაზე, ლარის კურსსა და 2020 წლის ბიუჯეტის პროექტზე.

კომპანია თი-ვი ემ-არ საქართველო, ნილსენის სატელევიზიო აუდიტორიის გაზომვების ოფიციალური ლიცენზირებული პარტნიორია. იგი დაარსდა 2004 წელს და 2005 წლის პირველი იანვრიდან უწყვეტად აწვდის საქართველოს სატელევიზიო ბაზარს კვლევის შედეგებს.