საქართველოს ეროვნული ნაკრების მთავარმა მწვრთნელმა, მილტონ ჰეიგმა და კაპიტანმა ჯაბა ბრეგვაძემ გააპროტესტეს ის ფაქტი, რომ რაგბის მსოფლიო თასზე მათ თამაშზე რუსული სიმღერა ირთვება. როგორც Popsport წერს, დღევანდელ მატჩზე ბორჯღალოსნების ლელოს აღსანიშნავად რუსეთში მოღვაწე წარმოშობით ქართველი მომღერლის, ვალერი მელაძის რუსულენოვანი სიმღერა ჩართეს.

"მინდა, მომენტი გამოვიყენო და თამაშის მომსახურე პერსონალს მეტი ყურადღებისკენ მოვუწოდო. მათ მატჩის დროს რუსული მელოდია ბევრჯერ ჩაგვირთეს და კარგი იქნება, თუკი ამ შეცდომას აღარ გაიმეორებენ" — განაცხადა კაპიტანმა მატჩისშემდგომ პრესკონფერენციაზე. ინტერვიუს თარგმანს Popsport ავრცელებს.

მომხდარი გააპროტესტა ჰეიგმაც და განაცხადა, რომ რუსეთი საქართველო არ არის, რაც მსოფლიო რაგბმა უნდა გაითვალისწინოს.

"ჩვენ სხვადასხვა ენა, სხვადასხვა კულტურა და სხვა ყველაფერიც განსხვავებული გვაქვს. ამდენად, კარგი იქნება, თუკი მსოფლიო რაგბი ამ მხრივ მეტ ყურადღებას გამოიჩენს", — განაცხადა ჰეიგმა.

ეს პირველი შემთხვევა არ არის, როდესაც საქართველოს ნაკრებს შეცდომით სხვა სიმღერას ურთავენ. მსოფლიო თასის დაწყებამდე შოტლანდიასთან მატჩის დროს საქართველოს ძველი ჰიმნი "დიდება" შესრულდა.

ბორჯღალოსნებმა დღეს ურუგვაის ნაკრები 33:7 დაამარცხეს და ბონუს ქულაც მოიპოვეს. საქართველოს ნაკრებმა 5 ლელო დადო.

რაგბის მსოფლიო თასი იაპონიაში მიმდინარეობს. საქართველოს ნაკრების მომდევნო შეხვედრა 3 ოქტომბერს გაიმართება.