ათასობით წელია, რაც ტატუ კაცობრიობის არსებობის განუყოფელი ნაწილია. მეტიც, იყო დრო, როდესაც სხვადასხვა ფორმისა და მნიშვნელობის ტატუ ადამიანების სტატუსის განსაზღვრაშიც კი დაგეხმარებოდათ.

აი, დღეს კი ტატუ ძირითადად საკუთარი თვითგამოხატვის ერთ-ერთი საუკეთესო გზაა და განსაკუთრებული პოპულარობით ახალგაზრდებში სარგებლობს.

თუმცა, ტატუს მოყვარულებისთვის დღეს კიდევ ერთი კარგი ამბავი გვაქვს. მეცნიერებმა შექმნეს ტატუ, რომელიც ფერს თქვენს ორგანიზმში ქიმიური შემადგენლობის მიხედვით იცვლის.

საქმე ის არის, რომ მიუნხენის ტექნოლოგიური უნივერსიტეტის მკვლევარებმა შეიმუშავეს მეთოდი, რომლის დახმარებითაც სპეციალური სითხით მოხატული გამოსახულების შეფერილობა ადამიანის სისხლის შემადგენლობაზე არის დამოკიდებული.

ეს სითხე სხვადასხვა საღებავებისგან შედგება, რომლებიც ადამიანის მეტაბოლიზმზე რეაგირებენ. უფრო კონკრეტულად კი სამ სხვადასხვა მაჩვენებელზე — მჟავიანობა, გლუკოზა და ცილა ალბუმინზე.

ექსპერიმენტის ფარგლებში მკვლევარებმა ღორის სხეული სამ სხვადასხვა ფერში მოხატეს, თითოეული მათგანი კი შეფერილობას ზემოთ ჩამოთვლილი მაჩვენებლების მიხედვით იცვლიდა.

იმისათვის, რომ ტატუს ფერით ადამიანებს სრული სურათი დაენახათ, მეცნიერებმა სპეციალური აპლიკაციაც შექმნეს, რომელიც ფერებს კითხულობს და საჭიროების შემთხვევაში ჯანრთელობის გაუარესების შესახებაც გვამცნობს.

კვლევის თანახმად, რომელიც ჟურნალ Angewandte Chemie International Edition-ში გამოქვეყნდა, მეცნიერები იმედოვნებენ, რომ მათ მიერ შექმნილი ინოვაციური ტატუ, განსაკუთრებით ქრონიკული დაავადებების მქონე ადამიანებს, ჯანმრთელობის მუდმივ გაკონტროლებაში დაეხმარებათ.

ფოტო: Yetisen et al. / Angewandte Chemie International Edition, 2019

მჟავიანობის განმსაზღვრელი ტატუ თუ ღია ყვითელი გახდა, ნიშნავს, რომ სისხლში მისი მაჩვენებელი ძალიან დაბალია, გალურჯების შემთხვევაში კი პირიქით - მაღალი.

ისიც უნდა აღინიშნოს, რომ უკუქცევადი მხოლოდ pH-ის ტატუა და, რა თქმა უნდა, თუ ტატუ მხოლოდ ერთჯერადად მოქმედებს, ეს დიდად პრაქტიკული არ არის. მეცნიერების თქმით, სინთეტური რეცეპტორების შექმნით შესაძლებელი იქნება, რომ დანარჩენი ორი "სენსორიც" უკუქცევადი გახდეს. თუმცა, მათი თქმით, ეს მომავალში ჩატარებული კვლევებით დადგინდება.

გლუკოზის განმსაზღვრელი საღებავი, ამავე ნივთიერების მაღალი შემცველობის შემთხვევაში ღია მწვანედან, მუქ მწვანე ფერში გადადის.

ხოლო, სისხლში ალბუმინის შემცველობის გამოსაცნობად მისი განმსაზღვრელი საღებავი ყვითელის ნაცვლად, მუქ მწვანე შეფერილობას იღებს.