20 ივნისის საქმეზე დაკავებულების ახლობლებმა თბილისის საქალაქო სასამართლოსთან მორიგი აქცია გამართეს. ისინი ე.წ. გავრილოვის პატიმრების გათავისუფლებას ითხოვენ.

აქციაზე დაკავებულების ახლობლების გვერდით დეკანოზ გიორგი მამალაძის ძმა, თორნიკე მამალაძეც დგას. მისი თქმით, ბრალდებულები უდანაშაულოები არიან.

მალხაზ მაჩალიკაშვილი აცხადებს, რომ მისი ძმისშვილი მორის მაჩალიკაშვილი მის გამო დააკავეს:

"ეს ყველაფერი იყო ხელისუფლების მიერ დაგეგმილი პროვოკაცია. ამათ სჭირდებოდათ ამ ადამიანების ციხეში გამომწყვდევა. ეს ყველა დაკავებული ჩემთვის არის მორის მაჩალიკაშვილი. ის მორის მაჩალიკაშვილი, რომელიც წელიწად-ნახევრის განმავლობაში იდგა ჩემ გვერდით და მკვლელების დაჭერას ითხვოდა".

ფოტო: ანა ვახტანგაძე / On.ge

დღეს, 23 სექტემბერს თბილისის საქალაქო სასამართლო 20 ივნისის საქმეზე დაკავებულების საქმეს განიხილავს.

16 სექტემებრს 20 ივნისის საქმეზე ერთ-ერთ დაკავებულს, სოსო ბაჯელიძეს აღკვეთი ღონისძიება პატიმრობა 5 000-ლარიანი გირაოთი შეეცვალა. გარდა ამისა, გამოძიების დასრულებამდე მას ქვეყნის დატოვება აეკრძალა.

20-21 ივნისის მოვლენებს საქართველოს პროკურატურა სახელმწიფო გადატრიალების მუხლით იძიებს. 20 ივნისის საქმეზე ამ დრომდე 20-მდე პირია პასუხისგებაში მიცემული.