დღეს, 5 მაისს, საქართველოს პრეზიდენტის მიერ პარლამენტში წარდგენილმა უზენაესი სასამართლოს მოსამართლეობის კანდიდატებმა, ანა დოლიძემ, თამარ ლალიაშვილმა და ნონა თოდუამ პრეზიდენტის ადმინისტრაციაში განაცხადეს, რომ პარლამენტის წევრების მხრიდან გაკეთებულმა განცხადებებმა მოსამართლეთა გამწესების პროცესი არასწორი მიმართულებით წაიყვანა.

ანა დოლიძემ განმარტა, რომ არასწორია, როდესაც მოსამართლეთა გამწესებაზე მსჯელობა არა კვალიფიკაციისა თუ სხვა საყოველთაოდ აღიარებული კრიტერიუმების მიხედვით მიმდინარეობს, არამედ კულუარული გარიგებების მოთხოვნით:

"საკითხის ამგვარად დაყენება შეურაცხყოფას აყენებს მოსამართლის მაღალ სტატუსს და სამართლიანი სასამართლოს იდეას. კულუარული გარიგებები სასამართლოს წინაშე მდგარ გამოწვევებს ვერ გადაწყვეტს, საზოგადოება სამართლიანი მართლმსაჯულების მოლოდინშია".

დოლიძემ იმედი გამოთქვა, რომ ქართველი ხალხის მიერ არჩეული პარლამენტი გადაწყვეტილებას მხოლოდ თითოეული კანდიდატის ცოდნის, განათლების, კვალიფიკაციისა და დამოუკიდებლობის ხარისხის გათვალისწინებით მიიღებს.

გუშინ, 4 მაისს, უმრავლესობის ლიდერმა, გია ვოლსკიმ განაცხადა, რომ უზენაესი სასამართლოს კანდიდატებთან დაკავშირებით პრეზიდენტმა უმრავლესობის ლიდერებთან კონსულტაციები უნდა გამართოს:

"ვფიქრობ, საზოგადოების დიდი ნაწილის პოზიციას გამოვხატავ ამ თემასთან [უზენაესი სასამართლოს კანდიდატების შერჩევა] დაკავშირებით. ეს თემა შეიძლება კონსტიტუციით ან რომელიმე კანონით არაა განსაზღვრული, მაგრამ ქვეყანას ეს სჭირდება".

აღნიშნულ განცხადებას უპასუხა საქართველოს პრეზიდენტმა, გიორგი მარგველაშვილმაც და განმარტა, რომ უმრავლესობის იმ წარმომადგენლებთან, რომლებიც მიიჩნევენ, რომ პრეზიდენტმა უზენაესი სასამართლოს კანდიდატები ერთპიროვნულად შეარჩია, კონსულტაციებს არ გამართავს. ინფორმაცია მარგველაშვილის მრჩეველმა ადამიანის უფლებებისა და მართლმსაჯულების საკითხში, კახა კოჟორიძემ, გაავრცელა.