ნათია მეზვრიშვილმა შინაგან საქმეთა მინისტრის მოადგილის თანამდებობა დატოვა. ამის შესახებ On.ge-ს ინფორმაცია ნათია მეზვრიშვილმა დაუდასტურა.

საზოგადოებრივი მაუწყებლის ინფორმაციით, მეზვრიშვილი მუშაობას მთავრობის ადმინისტრაციაში გააგრძელებს, ადმინისტრაციის ხელმძღვანელის თანამდებობაზე. თავად ნათია მეზვრიშვილი ამ ინფორმაციას უარყოფს.

მთავრობის ადმინისტრაციის უფროსის თანამდებობას ამ დროისთვის კახა კახიშვილი იკავებს. პრემიერ-მინისტრის აპარატის უფროსმა, გიორგი ჭოლაძემ კი, თანამდებობა რამდენიმე დღის წინ დატოვა.

ნათია მეზვრიშვილმა შს მინისტრის მოადგილისა და საპარლამენტო მდივნის თანამდებობა 2017 წელს დაიკავა.

2007-2009 წლებში ნათია მეზვრიშვილი ძველი თბილისის რაიონული პროკურატურის პროკურორი იყო.

2009-2013 წლებში კი საქართველოს მთავარ პროკურატურაში სხვადასხვა თანამდებობაზე მუშაობდა, კერძოდ: საპროკურორო საქმიანობაზე ზედამხედველობის დეპარტამენტის პროკურორი, ფინანსთა სამინისტროში გამოძიების საპროცესო ხელმძღვანელობის დეპარტამენტის პროკურორი, შს სამინისტროს რეგიონულ ტერიტორიულ ორგანოებში საპროკურორო საქმიანობაზე ზედამხედველობის სამმართველოს უფროსი, სტრატეგიული განვითარების სამმართველოს უფროსი, იურიდიული სამმართველოს უფროსი.

2013 წლის დეკემბრიდან იგი საპროკურორო საქმიანობაზე ზედამხედველობისა და სტრატეგიული განვითარების დეპარტამენტის უფროსის თანამდებობას იკავებდა.

ნათია მეზვრიშვილი არის მიწვეული ლექტორი ივ. ჯავახიშვილის სახელობის თბილისის სახელმწიფო უნივერსიტეტში და ასისტენტ-პროფესორი აღმოსავლეთ ევროპის უნივერსიტეტში