უნივერსალ ფიქჩერსი ახალ ტრეილერს ავრცელებს. ფილმი შავკანიან ქალსა და მამაკაცზეა, რომლებიც პაემნიდან სახლში მიდიან. გზაზე მათ პატრული გააჩერებს, თუმცა მოვლენები უჩვეულოდ და ტრაგიკულად განვითარდება. სლიმი შემთხვევით პოლიციელს კლავს, ამ ყველაფრის შემდეგ კი იძულებულნი არიან მიიმალონ. მომხდარი ფაქტი პოლიციის მანქანაზე დამონტაჟებულმა კამერამ დააფიქსირა, ვიდეო ინტერნეტში ვრცელდება, წყვილი უნებურად ტრავმის, ტკივილის, მწუხარების და ტერორის სიმბოლო ხდება, მათ მიმართ განხორციელებული უკანონო ქმედებების გამო. ისინი ხალხისგან თანადგომას იღებენ, რომლებიც მათ დამალვაში ეხმარებიან. ამ საშიშ და უცნაურ მოგზაურობაში კი წყვილი ერთმანეთს სხვა კუთხით აღმოაჩენს, მათ შორის ჩნდება სიყვარული, რომელიც ორივეს ცხოვრებას სამუდამოდ ცვლის.

ფილმის მთავარი გმირების როლებს დენიელ კალუია და ჯუდი ტერნერ სმიტი ასრულებენ. დენიელ კალუია მაყურებელი Black Mirror-იდან, Get Out-იდან და Black Panther-იდან იცნობს. ჯუდი ტერნერი კი ამომავალი ვარსკვლავია. ფილმი რეჟისორის მელინა მაცუკასის სადებიუტო ნამუშევარს წარმოადგენს.

ფილმის პრემიერა 27 ნოემბერს არის დაგეგმილი.