საოკუპაციო ხაზით გაყოფილ სოფელ ხურვალეთში სტუმრობის შემდეგ, ნატოს საპარლამენტო ასამბლეის პრეზიდენტმა, მედლინ მუნმა პირობა დადო, რომ ნანახი "მხოლოდ ანგარიშში არ დარჩება". ინფორმაციას პირველი არხი ავრცელებს.

"ეს იქ არ დამთავრდება, არამედ გავაკეთებთ ყველაფერს, რაც შეგვიძლია, რომ აქ მიმდინარე პროცესები უფრო ფართო საზოგადოებისთვის გახდეს გასაგები. ეს პრობლემა, სირთულეები და სისასტიკე, ეს ყველაფერი არ არის მთავრობებს შორის, არამედ ის ადამიანები აწყდებიან, რომლებიც პატიოსნად, მშვიდად ცხოვრობენ", — განაცხადა მან.

მუნმა გაიცნო მავთულხლართებს მიღმა მცხოვრები დავით ვანიშვილი, რომელიც საზოგადოებისთვის დათა პაპად არის ცნობილი. დათა პაპამ მას ოკუპაციაში ცხოვრებასა და რუსი სამხედროების მუქარებზე უამბო. პაპასთან საუბრის შემდეგ მუნმა საოკუპაციო რეჟიმს არაადამიანური და ულმობელი უწოდა.

"მნიშვნელოვანია, რომ ჩვენ თავად მოვისმინეთ ამ ადამიანის საუბარი და მადლობას ვუხდით სიმამაცისთვის, რომ მოვიდა და აგვიხსნა ყველაფერი, ის სირთულეები, რის წინაშეც დგას, რა ულმობელი და არაადამიანური პირობებია აქ, სადაც ადამიანებს საკუთარი მიწები ჩამოართვეს", — განაცხადა მან.