ტელეკომპანია რუსთავი 2 აცხადებს, რომ მათ ფეისბუქგვერდზე ჩნდება პოსტები, რომელსაც მომხმარებლები შეცდომაში შეყავს. კომპანია გულისხმობს მთავარი არხის პირდაპირ ეთერებსა და სიუჯეტებს, რომელიც მათ ფეისბუქგვერდზე ზიარდება.

რუსთავი 2-ის გენერალური დირექტორის, პაატა სალიას თქმით, მიუხედავად არაერთი კანონიერი მოთხოვნისა არხი ამ დრომდე ვერ ახერხებს საინფორმაციო სამსახურის ყოფილი უფროსისგან დაიბრუნოს ადმინისტრატორის უფლებები. მისივე თქმით, აღნიშნულის შესახებ უკვე ეცნობა სოციალური ქსელის ადმინისტრაციას და დაწყებულია შესაბამისი პროცედურები. სალია ფიქრობს, რომ ნოდარ მელაძის ქმედებები არის უპასუხისმგებლო და შესაძლოა შეიცავდეს კიბერდანაშულის ნიშნებს.

როგორ On.ge-ს ნოდარ მელაძემ განუცხადა, აღნიშნულთან დაკავშირებით განცხადებას გაავრცელებენ, რომელსაც მალევე შემოგთავაზებთ.

გუშინ, 10 სექტემბერს, დილას, სანამ მთავარი არხი ეთერში გავიდოდა მათი სიუჯეტი რუსთავი 2-ის ფეისბუქგვერდზე გაზიარდა, თუმცა მალევე წაიშალა. არხის საინფრომაციო სამსახურის უფროსმა, ნოდარ მელაძემ განაცხადა, რომ ორივე ფეისბუქგვერდს ერთი ადამიანი მართავდა და გაზიარებისას შეცდომა დაუშვა. იგივე განმეორდა საღამოსაც, როცა არხი პირდაპირ ეთერში გავიდა.