"როცა ხელისმომკიდე ხარ და გეუბნებიან რაც მოგინდება ის ჩაიცვიო... არაფერს ვნანობ!", — წერს საკუთარი ფეისბუქის გვერდზე კრისტინა მეადორი, რომელიც საკუთარი დის ქორწილში, არც მეტი, არც ნაკლები 50-დოლარიანი T-Rex-ის ფორმით გამოცხადდა.

მოკლედ, თუ ფიქრობთ, რომ ოჯახის წევრის ქორწილში დინოზავრად გარდასახვა დაუშვებელია, მაშინ, ძალიან ცდებით, რადგან ამ ქალის სახალისო პოსტს ინტერნეტში ძალიან დიდი და დადებითი გამოხმაურება მოჰყვა.

თავად კრისტინა კი არაფერს ნანობს და ამტკიცებს, რომ ამით არც არაფერი დაშავებულა. პირიქით, არც საკუთარი პრინციპებისთვის უღალატია და ბლომად ფულიც დაზოგა.

"რამდენიმე წლის წინ ჩემმა უფროსმა დამ მკითხა ვიქნებოდი თუ არა მისი ხელისმომკიდე. არადა, მან კარგად იცოდა, რომ კლასიკური კაბების ტარება საერთოდ არ მიყვარს და ამაში არც ბევრ ფულს გავიმეტებდი. სწორედ ამიტომ, დამპირდა, რომ ქორწილის დღეს უფლებას მომცემდა ჩამეცვა ნებისმიერი რამ, რაც მე მომინდებოდა".

ქალი იმასაც განმარტავს, რომ ყოველთვის უნდოდა დინოზავრის ფორმა ჰქონოდა, რადგან სახალისოა. "ჩემს დას მაშინვე მივწერე ჩემი გადაწყვეტილების შესახებ, ჩემდა გასაკვირად კი უბრალოდ გაეცინა და დამთანხმდა", — ამბობს კრისტინა ერთ-ერთ ინტერვიუში.