ქართული ოცნების თავმჯდომარემ, ბიძინა ივანშვილმა ექსპრემიერ მამუკა ბახტაძეს მადლობა გადაუხადა ფინანსთა მინისტრისა და პრემიერის რანგში მოღვაწეობისთვისა და "კულტურული წასვლისთვის". ივანიშვილმა აღნიშნა, რომ ბახტაძე "მადლობით გაუშვეს".

"კვირა დღეს საღამოს ჩვენ შეხვედრა გვქონდა უმრავლესობასთან, სადაც შევათანხმეთ ეს საკითხი. მადლობა გადაუხადა მთელმა გუნდმა, მე პირადად. დღესაც შემიძლია გავიმეორო, რომ მადლობით გავუშვით თანამდებობიდან საკუთარი სურვილით", — განაცხადა ივანიშვილმა.

მან ხაზგასმით აღნიშნა, რომ ბახტაძის წასვლა მოხდა "ძალიან კულტურული ფორმით" და კარგი იქნება თუ ეს პრაქტიკა არამხოლოდ ქართულ ოცნებაში, არამედ მთელ საქართევლოში დაინერგება.

"კაცი მოვიდა იდეებით, იყო მთავრობის მეთაური და მან მოახერხა იდეების გუნდთან შეთანხმება. რეალიზებაში მოიყვანა გეგმების დიდი ნაწილი და დანარჩენი პროცესები ჩაირთო და დაიწყო. ჩათვალა, რომ თავისი სიტყვა თქვა და ადგილი დაუთმო ახალს", — აღნიშნა ივანიშვილმა.

მამუკა ბახტაძემ თანამდებობა გუშინ, 2 სექტემბერს ფეისბუქპოსტით დატოვა. დღეს კი ივანიშვილმა კანდიდატად გიორგი გახარია წარადგინა.

გაიგეთ მეტი: