რუსთავი 2 კომედი შოუს მსახიობმა და ვანოს შოუს მუსიკალური ბენდის ხელმძღვანელმა, თამუნა ლეკვეიშვილმაც დატოვა. ამის შესახებ მან ფეისბუქგვერდზე დაპოსტა და განაცხადა, რომ ნიკა გვარამიას ახალ არხზე გადადის.

ნიკა გვარამიას მთავარ არხზე გადადის კომედი შოუ და კომედი არხიც. ამის შესახებ On.ge-ს ინფორმაცია გვარამიამ დაუდასტურა. მისივე თქმით, კომედი ჯგუფის 35 თანამშრომლიდან მასთან 28 გადავიდა, მათ შორის ვანო ჯავახიშვილი. ისვე აღნიშნავს, რომ დარჩენილებს შორის არის ალეკო მალხაზიშვილიც, თუმცა სხვა გვარებს არ აკონკრეტებს.

ქიბარ ხალვაშის მიერ რუსთავის 2-ის გადაფორმებიდან ერთი თვის თავზე არხიდან გაათავისუფლეს საინფორმაციო სამსახურის უფროსი, ნოდარ მელაძე. ტელეკომპანიის დირექტორის, პაატა სალიას თქმით, შვებულებიდან დაბრუნების შემდეგ კი გაათავისუფლებენ საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს. სალიამ მათი გათავისუფლების მიზეზად "ინტერესთა კონფლიქტი" და "შიდა ომები" დაასახელა.

ამ გადაწყვეტილების შემდეგ რუსთავი 2 პირდაპირ ეთერში დატოვეს კურიერის წამყვანებმა, დიანა ჯოჯუამ და მიშა სესიაშვილმა, მეორე დღეს კი თითქმის სრული შემადგენლობით ჟურნალისტებმა. რუსთავი 2 დატოვა რამდენიმე პროდიუსერმა, გადაცემების შაბათის შუადღის და კვირის სხვა შუადღის წამყვანებმა. ტელევიზია, ასევე, დატოვა P.S.-ის გუნდმა და რეგიონის ჟურნალისტებმა.