პოლიტიკური პარტია გირჩი აცხადებს, რომ მათ მიერ დაარსებული ახალი ტელევიზია გადასახადებს არ გადაიხდის იქამდე, სანამ დავალიანება 24 984 000 ლარს არ მიაღწევს. პარტიის თქმით, ეს თანხა ამ დროისთვის ჩამოწერილი ყველაზე დიდი დავალიანებაა, რომელიც მაუწყებელს ჰქონია.

გირჩში ამბობენ, რომ ტელემაუწყებლობა საქართველოში მეტწილად პოლიტიკური ბიზნესია და ტელევიზიები ვალის ჩამოსაწერად ორ გზას იყენებენ:

  1. "ასრულებენ ხელისუფლებაში მყოფი პოლიტიკური ძალის რუპორის ფუნქციას, რათა ხელისუფლებას უღირდეს გადასახადების გადაუხდელობაზე თვალის დახუჭვა";
  2. "ასრულებენ ოპოზიციაში მყოფი პოლიტიკური ძალის რუპორის ფუნქციას, რომ ხელისუფლების მხრიდან გადასახადების გადაუხდელობაზე რაიმე რეაქცია, საზოგადოების თვალში ოსტატურად შეფუთონ პოლიტიკურ ზეწოლად და სიტყვის თავისუფლების წინააღმდეგ ბრძოლად".

გირჩში მიაჩნიათ, რომ მაუწყებლები, რომლებიც უარს ამბობენ ამ ფუნქციებიდან ერთ-ერთის შესრულებაზე იჩაგრებიან. მიუხედავად იმისა, რომ პარტიას ნებისმიერი გადასახადი "ძარცვად" მიიჩნია, მედიაბაზარზე შექმნილი ამ რეალობას "წარმოუდგენელ უსამართლობას" უწოდებს.

ამ "უსამართლობის აღმოსაფხვრელად" გირჩი 4-პუნქტიან მიმართვას ავრცელებს:

  1. "გირჩი ტვ არ გადაიხდის არც ერთ გადასახადს, მანამ სანამ სახელმწიფოს წინაშე საგადასახადო დავალიანება არ მიაღწევს 24 984 000 ლარს (ერთი სამაუწყებლო კომპანიისთვის დღემდე ჯამში ჩამოწერილი ყველაზე დიდი საგადასახადო დავალიანება)";
  2. "გირჩი ტვ მოუწოდებს ყველა სამაუწყებლო კომპანიას, რომელიც წლების განმავლობაში იხდიდა გადასახადებს, ან რომელიც ახლა დაფუძნდება, რომ გააკეთონ იგივე";
  3. "მსხვილი სამაუწყებლო კომპანიებისთვის საგადასახადო დავალიანების კვლავ ჩამოწერის შემთხვევაში, გადასახადების გადახდის დაწყების ზედა ზღვარს გავზრდით შესაბამისი ოდენობით (მაგალითად: თუ რუსთავი 2-ს ჩამოეწერა დამატებით 28 მილიონი ლარი, გადასახადების გადახდას დავიწყებთ როდესაც გირჩი ტვ-ს საგადასახადო დავალიანება მიაღწევს 24 984 000 + 28 000 000 = 52 984 000 ლარს)";
  4. "აქ მზე არავინ არ არის".

ფინანსთა სამინისტროს განცხადებით, სამ ტელეკომპანიას აქვს სახელმწიფოს ვალი. კერძოდ, რუსთავი 2-ს 28 მილიონის ფარგლებში, იმედს 19 მილიონის, ხოლო მაესტროს 8 მილიონზე ცოტა მეტი. ივანე მაჭავარიანის თქმით, სამინისტრო მზადაა, "შევიდნენ მათ მდგომარეობაში". მისივე განცხადებით, მოლაპარაკებების საგანია ისიც, რომ ვალების ნაწილი ჩამოიწეროს.

გირჩის ახალი ტელევიზია ეთერში 21 აგვისტოს მაგთის საკაბელოზე, 61-ე არხზე გაეშვა. პარტიის განცხადებით, მიმდინარეობს მოლაპარაკებები და უახლოეს პერიოდში Girchi TV-ის ყურებას სილქ ტვ-ის მომხმარებლებიც შეძლებენ.

ამავე თემაზე: