ერთიანი ნაციონალური მოძრაობის წევრს, გივი თარგამაძეს, რომლის მანქანაც 2 დღის წინ ააფეთქეს, საგამოძიებო უწყების თანამშრომლები სახლში დაკითხავენ. აღნიშნული მიზეზი არის ის, რომ თარგამაძე აფეთქების შემდეგ თავს შეუძლოდ გრძნობს:

"მითხრეს, რომ სხვა ჯგუფი მოვა და სახლში ჩავატარებთ ამ საპროცესო მოქმედებას. მიუხედავად იმისა, რომ ჩემი ადვოკატები არჩევნებთან დაკავშირებით რაიონში წავიდნენ, მე მზად ვარ, ადვოკატების გარეშე მივცე ეს ჩვენება".

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.