საგარეო საქმეთა სამინისტროს სპიკერი ვლადიმერ კონსტანტინიდი აცხადებს, რომ გუგუტიანთკარში მიმდინარე უკანონო ბორდერიზაციის ფონზე საოკუპაციო ხაზიდან 7 ადგილობრივის გატაცება ქვეყანაში დესტაბილიზაციის მცდელობაა. მისი თქმით, გახშირებული პროვოკაციები და ინციდენტები კიდევ უფრო ამწვავებს უსაფრთხოების გარემოს და ამძიმებს ისედაც რთულ ჰუმანიტარულ მდგომარეობას კონფლიქტით დაზარალებულ სოფლებში.

კონსტანტინიდის განცხადებით, უწყებამ დაუყოვნებლივ გაააქტიურა ცხელი ხაზი, დაუკავშირდა ჟენევის საერთაშორისო მოლაპარაკებების თანათავმჯდომარეებს და პროცესში ჩართეს ევროკავშირის სადამკვირვებლო მისია.

საგარეო საქმეთა სამინისტრო მოუწოდებს რუსეთის ფედერაციას, დაუყოვნებლივ შეწყვიტოს უკანონო ქმედებები საოკუპაციო ხაზზე და პატივი სცეს ნაკისრ საერთაშორისო ვალდებულებებს. ასევე, დაიწყოს 2008 წლის 12 აგვისტოს ცეცხლის შეწყვეტის შეთანხმების უპირობო შესრულება, რადგან საქართველოს ტერიტორიიდან ჯარების გაყვანა არის ადგილზე მდგრადი მშვიდობისა და უსაფრთხოების დამყარების ერთადერთი გზა.

უწყება მიმართავს საერთაშორისო თანამეგობრობას, რომ ქმედითი ზომები მიიღოს საოკუპაციო ძალების უკანონო მოქმედებების შესაჩერებლად.

სახელმწიფო უსაფრთხოების სამსახურისა და პარლამენტის თავმჯდომარის განცხადებით, ამ დრომდე უცნობია გატაცებულების ადგილმდებარეობა. 7 პირი სოფელ ახალუბნიდან დღეს საღამოს გაიტაცეს.

უკვე რამდენიმე დღეა, რაც სოფელ გუგუტიანთკარში რუსი სამხედროები უკანონოდ ავლებენ ე.წ. საზღვარს. შედეგად ადგილობრივების სახლები, მიწის ნაკვეთები და სავარაუდოდ, წყლის რეზერვუარიც საოკუპაციო რეჟიმის მხარეს რჩება.