მარნეულის ქარხანა აჩერებს იმ წითელი ტყემლის წარმოებას, რომელშიც არასამთავრობო ორგანიზაცია momxmarebeli.ge-მ არასაკვები საღებავი აღმოაჩინა.

კომპანიის მიერ გავრცელებულ განცხადებაში ნათქვამია, რომ მათი ყველა პროდუქტი იწარმოება მხოლოდ ადგილობრივი ნედლეულისგან გარდა დამხმარე მასალებისა, რომელთა წარმოებაც საქართველოში არ ხდება (მარილი, შაქარი, სპეციალური დაფქვილი სახით სანელებლები და ასე შემდეგ) თუმცა, დამხმარე მასალების წილი 1% ზე ნაკლებია.

"ყველა მომწოდებელი არის საქართველოდან და ყველა მომწოდებელს წარმოდგენილი აქვს ხარისხის შესაბამისობის სერთიფიკატი. ჩვენ ყველა დამხმარე მასალას და ასევე, მზა პროდუქტს გავაგზავნით საერთაშორისო, ევროპულ ლაბორატორიებში, რისი დიდი გამოცდილებაც უკვე გვაქვს, დაველოდებით მათ პასუხს და შედეგებს ვაცნობებთ მომხმარებელს. პასუხებამდე ვაჩერებთ კონკრეტული პროდუქტის რეალიზაციას", — ვკითხულობთ განცხადებაში.

კომპანია მიესალმება ქართულ ბაზარზე საკვებ ინდუსტრიაში ხარისხის, პროდუქციისა და ნედლეულის წარმომავლობის გამჭვირვალე პროცესებს და იმედს იტოვებს, რომ ამგვარი კვლევები იქნება სისტემატური და არ ექნება პიარული ხასიათი.

არასამთავრობო ორგანიზაცია momxmarebeli.ge აცხადებს, რომ თბილისის სხვადასხვა მაღაზიაში შეძენილ სასურსათო პროდუქტში არასაკვები საღებავი აღმოჩნდა. კერძოდ, ორგანიზაციაში აცხედებენ, რომ შედეგები გერმანული ლაბორატორიისგან მიიღეს, სადაც 42 დასახელების ტყემლის, პომიდვრის საწებლის, აჯიკისა და წითელი წიწაკის (დაფქვილი) ნიმუშები გაგზავნეს.

არასაკვები საღებავები აღმოჩნდა შემდეგი დასახელების პროდუქტში:

  • ტყემალი წითელი, კლასიკური, შპს გსქ კულა;
  • ტრადიციული წითელი ტყემალი, შპს მარნეულის სასურსათო ქარხანა;
  • ტომატის საწებელი Supremo, შპს ფუდსერვისი;
  • ეს აჯიკა, შპს ეს;
  • ჩილი სოუსი ცხარე, შპს Soledo
  • მშრალი აჯიკა, თეთნულდი.