ჰონგ-კონგის საერთაშორისო აეროპორტმა ფრენები გააუქმა, ანტისამთავრობო პროტესტის გამო. ამის შესახებ BBC წერს. უკვე მეოთხე დღეა აეროპორტის მთავარ ტერმინალში ათასობით აქციის მონაწილეა შეკრებილი. ჰონგ-კონგის აეროპორტი მსოფლიოს ერთ-ერთი ყველაზე დატვირთული საერთაშორისო ჰაბია.

აეროპორტის მიერ გავრცელებულ განცხადებაში ნათქვამია, რომ საჯარო თავყრილობამ აეროპორტში ოპერაციების განხორციელება "საგრძნობლად შეაფერხა".

აქციის მონაწილეები ჰონგ-კონგის აეროპორტში

კვირას ჰონგ-კონგში სამართალდამცავებსა და დემონსტრანტებს შორის შეტაკება მოხდა. პოლიციამ მატარებლის სადგურზე იერიში მიიტანა და აქციის მონაწილეების წინააღმდეგ ცრემლსადენი გაზი გამოიყენა. ერთ-ერთ ვიდეოში ჩანს, რომ ტაი კოოს სადგურზე ოფიცრები ისვრიან რეზინის ტყვიებს საკმაოდ ახლო მანძილიდან. ასევე ჩანს, როგორც სცემენ პოლიციელები ხელკეტით ესკალატორზე მოქალაქეებს.

უკვე ორ თვეზე მეტია, სადავო საექსტრადაციო კანონის გამო დაწყებული დემონსტაციები აღარ წყდება. ახალი კანონის თანახმად, დაკავებულ პირს განაჩენს ჩინეთის სასამართლო გამოუტანს, რასაც ჰონგ კონგელების დიდი ნაწილი არ ეთანხმება.

ჰონგ-კონგს დიდი ბრიტანეთის კოლონიის სტატუსი 1997 წელს ჩამოერთვა და ჩინეთის შემადგენლობაში იმ პირობით შევიდა, რომ ფართო ავტონომია ექნებოდა, გარდა თავდაცვითი და საგარეო საკითხებისა, ის დამოუკიდებლად მიიღებდა გადაწყვეტილებებს.

მაშინდელი ლიდერები საზოგადოებას დაჰპირდნენ, რომ ჰონგ-კონგი, მაკაო და შეერთების შემთხვევაში ტაივანი, შეინარჩუნებდა პრინციპს — ერთი ქვეყანა, ორი სისტემა.