ცნობილი ბერძენი რეჟისორი იორგოს ლანთიმოსი მოკლემეტრაჟიანი კინოს ფორმატს უბრუნდება. მისი ბოლო სრულმეტრაჟიანი ფილმი The Favourite ოსკარის რამდენიმე ნომინაციაზე იყო წარდგენილი, მთავარი გმირის შემსრულებელმა ოლივია კოულმანმა კი ფავორიტის ნომინაციით საუკეთესო მსახიობი ქალის ჯილდოც დაიმსახურა. ამ ყველაფრის შემდეგ კი რეჟისორმა ახალი მოკლემეტრაჟიანი ფილმი Nimic გადაიღო

ფილმისთვის სცენარი დიდი ხნის თანამოაზრესთან, ეფთიმის ფილიპპოუსთან ერთად დაწერა. პრემიერა ლოკარნოს კინოფესტივალზე იგეგმება, ფილმში ოსკარის ნომინანტი მეთ დილონი და დეფნი პატაკია თამაშობენ. Nimic-ს ფესტივალი ასე აღწერს "მისეული ფენტეზის რაფინირებული და მსუბუქი ვერსიაა, პატარა, თუმცა ეფექტური თრილერი, როგორც ყოველთვის, დამაინტრიგებელი სტრუქტურით".

რეჟისორის ოფიციალურ განცხადებაში ვკითხულობთ:

მოხარული ვარ, რომ ასეთი შესაძლებლობა მომეცა. მოკლე ფორმატი ხანდახან გამოწვევებით არის სავსე, თუმცა ამავდროულად კმაყოფილების მომტანიც. სცენარი პატარა და დამაინტრიგებელი იდეის გარშემო განვავითარეთ და ძალიან ვისიამოვნეთ იმ თავისუფლებით, რაც ფილმზე მუშაობის პროცესში გვქონდა.

ფილმის ტრეილერის ნახვა ექსკლუზიურად IndieWire-ზეა შესაძლებელი.