ქართული ოცნების პოლიტიკა რუსეთის პოლიტიკასთან თანხვედრაშია — ასე გამოეხმაურა ერთიანი ნაციონალური მოძრაობის თავმჯდომარე გრიგოლ ვაშაძე აგვისტოს ომთან დაკავშირებით მართველი გუნდის განცხადებებს, რომლის მიხედვითაც, აგვისტოს ომზე პასუხისმგებლობა წინა ხელისუფლებას და ყოფილ პრეზიდენტს მიხეილ სააკაშვილს ეკისრება.

გრიგოლ ვაშაძის თქმით, 7 აგვისტო ქართულმა ოცნებამ არა გმირებზე არამედ წინა ხელისუფლებაზე სალაპარაკოდ გამოიყენა.

"ოლიგარქ ივანიშვილის ქართულმა ოცნებამ ეს დღე დაპირისპირებისათვის გამოიყენა, თავს დაესხა ოპოზიციას და 2008 წლის აგვისტოს ომზე პასუხისმგებლობა საკუთარ სახელმწიფოს დააკისრა, რასაც შეიძლება საქართველოსათვის გამოუსწორებელი შედეგები მოჰყვეს. ეს არ იყო შემთხვევითი. ქართული ოცნების "თვალსაჩინო" სახეები საზოგადოების წინაშე ორგანიზებულად წარსდგნენ წინასწარ მომზადებული გზავნილით, სადაც 90% საკუთარი სახელმწიფოსა და სამხედროების დადანაშაულებაა . რუსეთი მხოლოდ ზედაპირულად ახსენეს, პუტინი კი, მათ განცხადებებში საერთოდ არ ყოფილა ნახსენები", — განაცხადა გრიგოლ ვაშაძემ.

მან ასევე თქვა, რომ დასავლური სახელმწიფოს ლიდერები საქართველოს დეოკუპაციას მოითხოვენ, ოცნება რუსეთის აგრესიის "გაპრავებით" არის დაკავებული.

"ეს გზავნილები რუსულ აგრესიულ პოლიტიკასთან სრულ თანხვედრაშია. გავიხსენოთ ზურაბიშვილის მთავარი საარჩევნო გზავნილი - საქართველომ დაბომბა "მძინარე" ცხინვალი. ვოლსკის ტექსტები, რომ თითქოს საქართველოს ხელისუფლებამ ჩაშალა სამშვიდობო მოლაპარაკებები, არ დაიცვა საკუთარი მოქალაქეები", — ამბობს ვაშაძე.

მისივე განცხადებით, საქართველომ რუსეთის ფედერაციას შესთავაზა რამდენიმე სამშვიდობო გეგმა, მათ შორის ეუთოს სამშვიდობო მოლაპარაკებების ფარგლებში, აგრეთვე დათანხმდა გერმანიის საგარეო საქმეთა მინისტრის შტაინმაიერის მიერ შემოთავაზებულ სამშვიდობო გეგმაზე და ყველა ეს გეგმა სწორედ რუსეთის ფედერაციამ ჩაშალა.

"უშუალოდ 6 და 7 აგვისტოს ჩვენ მივმართეთ ყველა სამშვიდობო ზომას, რათა ვითარების ესკალაცია არ მომხდარიყო. ამ ღონისძიებების შესახებ დიპლომატიური კორპუსი საქმის კურსში იყო.

საქართველოს ხელისუფლებამ 7 აგვისტოს სამხედრო ოპერაცია დაიწყო სწორედ საკუთარი მოქალაქეების დაცვის მიზნით. სწორედ ქართველი სამხედროების ქმედებების შედეგად გამოყვანილ იქნა ათასობით ადამიანი", — განმარტავს გრიგოლ ვაშაძე.