ჟურნალისტური ეთიკის ქარტია და მედიასაშუალებები სამთავრობო უწყებების პრესსამსახურების იმ პრაქტიკაზე საუბრობენ, როდესაც ბრიფინგებისა თუ პრესკონფერენციის გაშუქებისას მიწვეულმა ჟურნალისტებმა ღონისძიების თემა არ იციან. ქარტიის შეფასებით, ეს დამკვიდრებული "ცუდი პრაქტიკა" ხელისშემშლელია როგორც მაუწყებლებისთვის, ისე მცირე გამოცემებისთვის.

როგორც განცხადებაში ვკითხულობთ, უმნიშვნელოვანესია რედაქციებმა იცოდნენ, რა საკითხზე იმართება ბრიფინგი თუ პრესკონფერენცია, რათა საკუთარი ადამიანური თუ ტექნიკური რესურსის გათვალისწინებით, სარედაქციო პოლიტიკისა და ინტერესების შესაბამისად გადაწყვიტონ, სურთ თუ არა დასწრება და გაშუქება.

ქარტიაში ამბობენ, რომ განსაკუთრებული პრობლემა ექმნებათ მაუწყებლებს, რადგან თემის არცოდნის გამო თავად ვერ წყვეტენ ბრიფინგი ჩართონ პირდაპირ ეთერში თუ სიუჟეტის ფორმატში გააშუქონ. ასევე, გამოწვევების წინაშე დგანან მცირე მედიასაშუალებებიც, რომლებიც მცირე ადამიანური რესურსის გამო ვერ წყვეტენ გააგზავნონ ჟურნალისტი გასაშუქებლად თუ არა.

"საერთო ჯამში კი ის ჟურნალისტები, რომლებიც მიდიან ბრიფინგის გასაშუქებლად, არიან მოუმზადებლები და ვერ ახერხებენ ადეკვატური კითხვების დასმას და ინფორმაციას მხოლოდ ავტომატურ რეჟიმში გადასცემენ", — ნათქვამია განცხადებაში.

ამასთანავე, ზოგიერთი მედიასაშუალება დისკრიმინაციულ მიდგომაზეც საუბრობს და ამბობს, რომ მათთვის არათუ თემა, არამედ თავად ღონისძიების გამართვის შესახებ ინფორმაციაც უცნობი რჩება.

ქარტია განმარტავს, რომ მედია არ არის რომელიმე სამთავრობო უწყების პრესსამსახურის დანამატი და მისი ფუნქცია ბრიფინგისთვის ეთერის დათმობას არ გულისხმობს. მედიის მთავარი როლია საჯარო ინტერესის შემცველი ამბების გაშუქება და საზოგადოებისთვის საინტერესო კითხვების დასმა. მათივე თქმით, მედიამ უნდა გადაწყვიტოს არსებობს თუ არა აუდიტორიის ინტერესი ამა თუ იმ თემის მიმართ, ამის მიხედვით შეარჩიოს გაშუქების ფორმატიც და მოემზადოს შესაბამისი კითხვების დასასმელად.

"ყოველივე ზემოაღნიშნულიდან გამომდინარე, გთხოვთ გადახედოთ მედიასთან კომუნიკაციის სტრატეგიას, ბრიფინგების, პრესკონფერენციის გამართვამდე გარდა გამოცემებთან პირადი კომუნიკაციისა, გამოაქვეყნოთ ანონსი ვებგვერდის მეშვეობით, რათა მედიას არადისკრიმინაციულად მიაწოდოთ ინფორმაცია მიუხედავად იმისა, მათი სარედაქციო პოლიტიკა მისაღებია თუ არა რომელიმე სახელმწიფო უწყებისათვის. ამასთან მოგიწოდებთ გაითვალისწინოთ ჟურნალისტების ინტერესები, მისცეთ მათ კითხვების დასმის და დამატებითი ინფორმაციის მიღების საშუალება, რათა შეძლონ საზოგადოებისთვის საინტერესო ინფორმაციის კვალიფიციურად მიწოდება", — ნათქვამია განცხადებაში.

საქართველოს ჟურნალისტური ეთიკის ქარტიის წევრი ჟურნალისტების გარდა მიმართვას უერთდებიან 28 მედიასაშუალება:

• ტელეკომპანია პირველი;
• რუსთავი 2;
• საზოგადოებრივი მაუწყებლის აჭარის ტელევიზია და რადიო;
• კავკასია;
• პალიტრანიუსი;
• სტუდია მონიტორი;
• რადიო ჰერეთი;
• რადიო თბილისი;
• რადიო ფორტუნა;
• რადიო პალიტრა;
• რადიო მარნეული;
• ინტერპრესნიუსი;
• On.ge;
• ტაბულა;
• პრაიმტაიმი;
• საინფორმაციო ცენტრების ქსელი;
• livepress.ge;
• skeqtri.ge;
• knews.ge;
• media.ge;
• sova.news;
• ქრონიკა +;
• ipress.ge;
• Globalpress.ge;
• FirstNews.ge;
• newpress.ge;
• მედიაჯგუფი აჭარა p.s.;
• Kavkazexpressmediacompany.com.