თავისუფლების მონიტორის ინფორმაციით, ქართული ოცნების დეპუტატის, კახა ოქრიაშვილის ცოლის, ლინა თოფურიას კომპანია სახელმწიფომ 1 145 000 ლარით დააფინანსა. საუბარია კამპანია აწარმოე საქართველოზე, რომელმაც PSP ჯგუფში შემავალი კომპანია ჯი-ემ-პი სესხის სახით დააფინანსა.

რეესტრის მონაცმეების მიხედვით, ჯი-ემ-პი-ის ერთადერთი მფლობელი ლინა თოფურიაა, რომელიც ქართული ოცნების დეპუტატის, კახა ოქრიაშვილის ცოლია. ამ კომპანიას 2016-17 წლებში მმართველი პარტისთვის 240 000 ლარი აქვს შეწირული.

თავისუფლების მონიტორთან საუბარში კომპანიის დირექტორი გიორგი ანთაძე ამბობს, რომ ბიზნესმა სახელმწიფოსგან სუბსიდირება არ უნდა მიიღოს.

"PSP-ს დამფუძნებელი დამაარსებელი გახლავთ პოლიტიკური ფიგურა. ამით იყო განპირობებული ასეთი ორიენტაცია ამ ჯგუფის", — აცხადებს ის.

ანთაძის თქმით, ბიზნესის გაფართოებას ამ პროგრამის გარეშეც შეძლებდნენ და გეგმავდნენ კიდეც.

"ეს პროგრამა რომც არ ყოფილიყო, ჩვენ ისედაც ვფიქრობდით წარმოების გაფართოებას და ისედაც ვაკეთებთ ამას მრავალი წელია და მომავალშიც ვგეგმავთ. უბრალოდ, ეს იყო შეღავათიანი კრედიტი და არცერთი ჭკუათმყოფელი ბიზნესმენი შეღავათიან კრედიტზე აურს არ იტყვის", — აცხადებს ის.

რაც შეეხება თავად კახა ოქრიაშვილს, ის ფიქრობს, რომ ნებისმიერი ბიზნესს, რომელიც საქართველოში რამეს აწარმოებს მხარდაჭერა სჭირდება, მათ შორის ბიუჯეტიდან.

"პროგრამა უნდა იყოს, მაგრამ ეგრე არ უნდა იყოს გაკეთებული. პირდაპირ ბანკების გარეშე უნდა იყოს მიწოდებული ეს თანხები მეწარმეებზე", — განუცხადა ოქრიაშვილმა თავისუფლების მონიტორს.