თავდაცვის ყოფილი მინისტრი და გამარჯვებული საქართველოს დამფუძნებელი, ირაკლი ოქრუაშვილი ამბობს, რომ სხვადასხვა საქმეებზე ჩვენებების ნაწილი ქართული ოცნების მოთხოვნის შესაბამისად მისცა. გადაცემა რეაქციაში ყოფილმა მაღალჩინოსანმა თქვა, რომ ჩვენებების ნაწილი ობიექტურია, ნაწილი კი ბიძინა ივანიშვილის მოთხოვნით მიცემული.

"სამი წლის განმავლობაში მე ვცდილობდი მათთან ურთიერთობის გარკვევას. თავმოყვარეობის შელახვამდე შეიძლება დავედი იმისთვის, რომ მათი გული მომეგო. გორის საკრებულოს თავმჯდომარე დამითმეს. გორის საკრებულოს თავმჯდომარის თანაშემწედ დამნიშნეს და კახა კალაძის "შპინგალეტი" თანაშემწე მირეკავს, სამხარაძეა მგონი გვარად და პარლამენტშია, მეუბნება, ჩვენს ინტერესებში საკრებულოს თავმჯდომარის თანაშემწეობა არ შედიოდაო. თანაშემწე რომ არ იყო საკრებულოს თავმჯდომარის იმ ყველაფრის ფონზე, რასაც მთხოვდნენ?" — განაცხადა ოქრუაშვილმა.

მისივე თქმით, მიხეილ სააკაშვილის, ზურაბ ადეიშვილისა და მერაბიშვილის წინააღმდეგ, როგორც მოწმე გამოიყენეს. გარდა ამისა, ოქრუაშვილი ამბობს, რომ ხელისუფლება გარკვეულ საქმეებზე დახმარებას და მათი ინტერესების შესაბამისად პოზიციის დაფიქსირებას ითხოვდა.

ჟურნალისტის კითხვაზე, გულისხმობდა თუ არა პოლიტიკოსი, რომ სააკაშვილთან, ადეიშვილთან და მერაბიშვილთან მიმართებაში არასწორი ჩვენება მისცა, ოქრუაშვილი ამბობს, რომ ივანიშვილმა მშვენივრად იცის, მისი მოთხოვნით რა საქმეებზე რა ჩვენება აქვს მიცემული.