საქართველოს პრეზიდენტი, სალომე ზურაბიშვილი მიმდინარე წლის სექტემბრის ბოლოს გაეროს 74-ე გენერალურ ასამბლეაზე სიტყვით გამოვა. ამის შესახებ ბრიფინგზე პრეზიდენტის პრესსპიკერმა, ხატია მოისწრაფიშვილმა განაცხადა.

მისივე თქმით, გაეროს ფორმატში გაიმართება მაღალი დონის თემატური შეხვედრები, მათ შორის: მდგრადი განვითარების მიზნების, უნივერსალური ჯანდაცვისა და კლიმატის საკითხებზე. გენერალური ასამბლეის კვირეულში, ნიუ-იორკში საქართველოს პრეზიდენტის მონაწილეობით იგეგმება ორმხრივი შეხვედრები სხვადასხვა ქვეყნების ლიდერებთან და გაეროს სააგენტოების ხელმძღვანელებთან.

ამასთანავე, პირველ სექტემბერს სალომე ზურაბიშვილი ვარშავაში მეორე მსოფლიო ომის დაწყებიდან 80 წლის იუბილესთან დაკავშირებულ ღონისძიებას დაესწრება. ღონისძიებას ერთობლივად უმასპინძლებენ პოლონეთის პრეზიდენტი, ანდჟეი დუდა და გერმანიის პრეზიდენტი ფრანკ-ვალტერ შტაინმაიერი. 2 სექტემბერს კი ვარშავაში გაიმართება კონფერენცია თემაზე "ქალთა როლი პოლიტიკაში", რომელზეც საქართველოს პრეზიდენტი სალომე ზურაბიშვილის სიტყვით გამოვა.